創業起義| 學習英國人的不着緊(尹思哲)

更新時間 (HKT): 2021.01.09 16:29

喺啱啱過去嘅聖誕節,因為疫情,全英lockdown,冇得見朋友吹水,冇得外出食好西,再加上步入嚴冬,大部分時間都宅在家中。不過反而多咗時間,研究下近期英國嗰樓市。

由於朋友創辦人K,想喺Milton Keynes買樓,託我幫手睇樓同出Offer。我唔想幫倒忙,唯有臨時填鴨式惡補,睇埋唔少「移英YouTuber」,老實講資訊量都幾豐富。

我嘅主要經紀,分別叫Michael同Carrie,剛好一男一女,兩個都係本地白人,分別是中女和後生仔。比起香港經紀「搏晒老命」、一日可以call你五六次,而且永無收工時間,入夜都仲收到電話,老實講英國經紀hea得多。

首先,英國地產經紀鍾意send email,每日頂多收到佢哋1-2次回信,而且辦室時間一過,唔理電郵電話都好,你唔可能揾得到佢,佢亦唔留手機WhatsApp俾你。

話說放聖誕假之前,Michael仔咁同我講:「你哋嗰offer,業主唔okay呀,希望可以再添啲。」我同創辦人K商量之後,聖誕假途中,就覆返Michael:「係咁意加3千鎊,唔該同業主講吓,一人讓一步啦。」

結果,放完悠長Lockdown假期,Michael竟然同我講:「你最初嗰offer,業主okay咗喇!」要知道,英國奉行單邊代理制,Michael只會代表業主,理論上佢地利益一致,唔通香港買家真係咁吃香?

再諗深一層,Michael好大機會無睇email,或者就放假太開心,唔記得update業主,放完假業主接受咗最初嗰offer。不過無論如何,英國打工仔呢種「唔上心」,我真係覺得,好值得香港人好好學習吓。

以前嘅香港,太平盛世時候,想要出人頭地,想上流,係有需要打幾份工,就算一分工,老細都唔會咁易放你走,其實唔怪香港人急躁。今日嘅香港,亂到九彩唔講,點做點博都好難上流,相反要喺呢個社會生存,唔係鬥你幾有實力,而係鬥持久力鬥唔好死。

對於工作,英國人普遍不着緊,意思未必係不專業,但佢哋識得放慢節奏,職場文化唔會同老闆急。平時生活,亦係同一個道理,所以屋企有咩壞咗DIY修理,節日會收到鄰居親筆聖誕咭。

英國人呢份不着緊嘅慢活藝術,稍為待慢工作,變相善待自己,香港人無論移民要融入,定還是留底鬥長命,都好應該加以學習。

尹思哲

http://linkedin.com/in/wanszezit

-----------------------------

掌握理財智慧 感受生活品味

investMAN全新網頁 優雅登場

-----------------------------

部署退休 輕鬆達至財務自由

點擊即睇《退休理財天書》

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner