【笑到最後】虛擬貨幣與虛擬移民 - 高明

更新時間 (HKT): 2021.01.18 02:00
■下一代炒港股嘅人已經大減,更加多人轉炒美股。美股勝在市場較闊,包容性較大。 資料圖片

2021年,有KOL撰文表示,繼續對比特幣持懷疑態度,一定不會投資比特幣。正如本欄之前文章「一注獨贏買姜濤」所講,比特幣可能真係騙局一個,但係傳統財經界提供唔到願景,點樣賺得多過呢個騙局,結果仍然係推介橫行十年嘅港股,繼續用同樣精神面對未來10年,肯定不進則退。

另一個要跟隨時代轉變嘅概念,叫做移民。剛剛過去一個星期,全球已經出現社交媒體移民潮,由WhatsApp轉Signal,由facebook轉MeWe。上一個世代,大家興高采烈迎接社交媒體,覺得係推倒舊有霸權,最後發覺科技企業只係借助大家嘅力量,成為新霸權。今次由科技巨企,移民到科技細小企業,普遍心態理智得多,就係用新一代程式去制衡科技霸權。

唔同環節嘅移民,其實一早已經出現。上連登望一望股票post,下一代炒港股嘅已經大減,但係賭性永遠唔會消失,更加多人轉炒美股,投資上也移民。高明經歷過幾個港股牛市,港股嘅困難,在於市場太過單一,會計佬、條例佬、幕後佬玩港股可能得心應手,喺呢三方面唔係專家嘅人,炒港股就蝕章,更何況,近年港股加入國情概念,令到上述三者都變成閒角。相對而言,美股市場較闊,包容性較大。

人濟關係、財富儲存同埋投資搵食,一早已經移民。近年趨勢,只係將移民呢個特權平民化、去中心化,情況有如Bitcoin,大家都可以印鈔(掘礦)、又可以縮表(忘記密碼或掉咗隻harddisk)。

新霸權取得權力後不斷中心化,失望嘅人不斷搵方法去中心化,世界發展向兩邊扯。覺得移民等同去搬磚、洗大餅,呢種思維等同十年前話bitcoin係騙局。唔想行其他人條舊路排隊尾,真係要思考點跳出前人訂嘅框框。

高明

fb.com/bigricetea

關心你飯碗,貼近你生活,即Like「蘋果ATM」FB專頁!
BannerBanner