【樂活道】政府無能 港人移民 - 藍友斑

更新時間 (HKT): 2021.01.20 02:00
■政府的保就業津貼,令企業多咗一筆額外嘅收入,但實際保障打工一族的效果並不明顯,反而助長貧富差距。 資料圖片

昨日是1月19日,恒生指數大升接近800點,幾乎觸及很久沒見的三萬點位置。正當身邊富豪好友個個股票賺錢魚翅撈飯時,本地失業率就剛剛破16年嘅歷史新高。

股票市場嘅歌舞昇平,與就業市場嘅遍地屍骸形成了強烈對比。好在之前我都有聽股票好手話,買咗些少股票,執番啲入油錢。

當股市與經濟兩者極度分化,充份表現咗乜嘢叫「貧者越貧,富者越富」。香港人經常都想樓價跌時借錢置業,但係事實上,樓係畀窮人住,而唔係畀窮人買。點解?因為當經濟差、樓價跌嘅時候,窮人的收入會更唔穩定,更加難以向銀行借錢。窮人對住樓市,永遠都係望門興嘆。

新冠肺炎對實體經濟的打擊十分巨大,打工嘅基本都手停口停。但有錢人呢?則繼續賺取資本回本,同埋賺取租金。正當窮人在疫情下為下一期租金奔波嘅時候,有錢人則繼續收息收租,藉機喺樓價下跌時買多一間。

而最神奇嘅係,早前政府推出咗保就業計劃,但似乎沒有令打工嘅真正受惠,反而係幫咗一啲手持資本嘅有錢人。例如國泰(293)在獲得數以億計的津貼後,依然要炒近六千多人。

保障大企業 忽略打工仔

好多嘅大企業,都因為政府的保就業津貼,而多咗一筆額外嘅收入。簡而言之,保就業計劃就是漏洞多多,實際保障打工一族的效果並不明顯,反而助長貧富差距。

這也解釋了為何在失業率高企的情況下,股市竟然爆升。當然,全球量化寬鬆是其中一個原因,大陸嘅南下資金也是另一原因。但最神奇嘅係,當政府成為了企業的救生圈,只要政府繼續無能,就可叫政府出錢為你解決問題,咁樣又點會輸錢。企業一邊對住政府喊苦喊忽,另一邊就對住員工手起刀落。

有錢人就是喜歡政府無能,你沒有執行力,就只好畀錢解決問題。一個無能而只識洗錢嘅政府,就好似一個水魚一樣,永遠都只會俾人呃。譬如海洋公園,政府唔識救,就找了個有錢哥兒來領班。上台後大刀闊斧。早前又說若政府不再借貸就會收檔,現在更把整個營運模式反轉,只要一句「唔咁樣做就無得救」,右手一巴掌車去無能嘅政府,另一隻手就伸入政府嘅褲袋攞錢。

政府無能至此,口中只剩下錢錢錢,香港還哪有讓人留戀的理由?當香港人想移民,政府又怎能怪一眾港人?

藍友斑

fb.com/bernardlamhongkong/

關心你飯碗,貼近你生活,即Like「蘋果ATM」FB專頁!
BannerBanner