【魚樂無窮】北水目標吼呢隻 - 唐牛

更新時間 (HKT): 2021.01.21 02:00
■中金股東陣容粒粒皆星,加上AH差價勁闊,博北水南下搶平貨,有數得計。互聯網圖片

恒指三萬點近在咫尺,配合兩日3,000億元大成交,全城高呼北水大時代。與戰友打趣說,行開幾日唔睇個市,你會發現股價變得很陌生︰騰訊(700)轉眼間逼近700蚊,港交所(388)一個月唔夠,由3字頭變咗5字頭。

唔知係啱啱遇着剛剛,抑或係預設路線圖,大市一片歌舞昇平之際,馬雲消失兩個月後突然現身,出席網上教師頒獎禮,片段一出,阿里系全線落鑊,其中旗艦阿里巴巴(9988)最多爆升逾一成,一來追落後,二來挾淡倉,連二師兄都回歸,指數見3字頭冇難度。

fb中午post同大家講,入咗隻中金公司(3908)。揀中金首要貪佢名牌效應,除咗自身做大刁多、食大茶飯外,股東陣容亦是粒粒皆星,騰訊及阿里巴巴都係股東,背景之勁可想而知;另一個賣點係AH差價勁闊,A股昨日收報69.49元人民幣,H股收24.05港元,H股變相三折大平賣,為十大H股折讓股之一,博北水南下搶平貨,有數得計。集團中期盈利增長62.3%至30.5億元人民幣,相當於上一年度盈利七成,說穿了又是潛在盈喜股。大摩最新給予目標價25.12元,以現時的熾熱氣氛,相信只是中途站。

唐牛

http://fb.com/tongcow88

關心你飯碗,貼近你生活,即Like「蘋果ATM」FB專頁!
BannerBanner