【智取大市】北水「抱團」短線冇走雞 - 晉佳

更新時間 (HKT): 2021.01.25 02:00
■ 敏華控股主席黃敏利。 互聯網圖片

美國候任財長耶倫表明對抗中國冇手軟,與此同時加密貨幣市場震倉,令港美股齊齊調整,但兩個市場仍有個股喪炒冇手軟。

耶倫言論令資金近日避開中美角力因素,貫徹特朗普時期嘅口味炒高科技股,同時制裁股回吐,但市場繼續保持興奮嘅氣氛,納指上周五更加微升,睇怕今個星期整固後會延續升勢。上星期騰訊(700)、美團(3690)、SaaS股逆市升,估計周初仍有餘威,但以美團超買情況睇,嚟緊點都會唞氣,倒不如要留意其他板塊接力炒。

光伏大翻生,早排信義光能(968)亦當炒,連副主席董清世夫人都入股陽光能源(757)。呢個陣營近期動作多多,老友鬼鬼嘅敏華(1999)呈慢升狀態,舊年3月低位到𠵱家升近4倍,股份前周五宣佈配股,上周一股價已幾乎收復失地,然後再破頂,近日保持5天線樓上穩步上揚,成交亦慢慢回落至配股前水平,周五無懼大跌市,係短線續升嘅預兆。

值得一提,由1月15日至22日,6個交易日內北水增持敏華成8,210萬股,佔6日成交44%,增持股權幅度2.07%,僅次於一批制裁股以及微盟(2013)。大股東黃敏利加上大媽持貨已佔83.4%,北水成功抱團,只要港股繼續喪炒,呢一浸敏華唔會輸蝕。

講開同一陣營,同樣老友嘅東江集團(2283)月初爆上然後做旗,連日成交收窄,3元屢獲支持,似乎準備開車。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner