【笑到最後】反思港股vs美股 - 高明

更新時間 (HKT): 2021.01.25 02:00
■美股球場夠大,加上AI盤多,更接近教科書嘅「有效市場假設」,即係升跌較合常理。 資料圖片

美股自從11月中開展升浪,中間近乎未出現調整,萬眾期待,美股出現一次類似舊年九月嘅調整,清洗過度樂觀嘅持倉,然後繼續健康發展。上星期五,港股下跌480點,港股今年追落後,升幅係全球指數前列,本來預期港股下跌,美股都出現較似樣嘅調整,點知同晚道指只係跌0.57%,納指更加不跌反升。

港股出現調整,據稱,係因為北水流入減少。好多朋友都話,港股升跌冇邏輯,所以好難炒。高明嘅經驗係,港股升跌有時跟邏輯,有時唔跟邏輯,所以特別難炒。

美股一樣有deep state,但球場太大,創辦人為集資一路賣股揸貨唔多,主要股份幾億對眼望住出術冇咁易(總統大選後難講),加上AI盤多,反而更接近教科書嘅「有效市場假設」,即係升跌較合常理。

港股近年加多一個要求,叫做國情。近例係螞蟻集團取消上市以至阿里巴巴(9988)一系列事件,遠超本地會計佬、條例佬、莊家佬想像。所以呢幾年唔會見到香港有新晉股神,因為國情並唔係條例咁寫出嚟,冇model answers、冇圖睇,考試叻嘅本地精英永遠無法參透。

撇除一系列本地中概股,真正長升長有嘅港股係港交所(388)。港交所過去一年升89.5%;同期紐交所母公司洲際交易所(ICE)上升15%;納斯達克公司(NDAQ)過去一年上升27%。「2020年叱咤股壇我最喜愛股份」Tesla過去一年升649%。港交所係單一上市渠道,集條例及國情於一身,名符其實嘅尋租股。相對Tesla係賣「發現新大陸」概念。

所以港股vs美股,係睇你適唔適合。熟例熟國情炒港股如魚得水,轉炒美股未必適用。如果成日好勞氣講:「明明間公司業績得,點解唔升」,可能轉場美股會啱你啲。

高明

fb.com/bigricetea

關心你飯碗,貼近你生活,即Like「蘋果ATM」FB專頁!
BannerBanner