操盤手札記|舊經濟都有破頂股(割柑人)

更新時間 (HKT): 2021.01.25 18:11
申洲國際董事長馬建榮。央視截圖
(電視畫面)

大媽挺港女!今年以嚟,北水湧入港股高達2,500億元,咁大規模,唔係一般大媽,主力其實係內地基金大戶,甚至有國家隊身影。北水南下,除咗「撐被制裁股」、「佔領中環」、「奪取定價權」,亦反映中央透過拓闊對外投資渠道,釋放資金外流,減慢人民幣升值過快壓力。

北水今趟掃完三大中資電訊股,再掃中資科技股巨頭,抱團炒高。不過,香港作為國際代理人滙聚之地,北水想喺鱷魚潭食大茶飯唔係食硬。舊年7月中芯(981)回A就係一例,股價一個月掃高1.4倍,但兩日間插低近四成。雖然話「升勢勿估頂」,但跟北水炒宜做好風險管理。

北水炒高權重股,指數亦水漲船高。恒指上周四破三萬關後回調,翌日跌穿近月升浪沿路而上嘅5天線,但周一迅即重上該線,收30,159,升2.4%。恒指喺聖誕節後由26,300水平開始呈45度角上升,一個月累升一成半,已overshoot,短期或會調整,支持睇5天線同上周二上升裂口。

值得注意嘅係,周一升市功臣又係科技巨頭ATMX同港交所(388),52隻藍籌中,六成半(34隻)報跌,反映大市升勢唔夠全面。不過,喺藍籌升幅榜中,有隻舊經濟股打入四大,就係申洲(2313)。申洲係中國最大嘅縱向一體化針織服裝製造商,具內需概念兼受惠全球經濟復蘇。

隨着疫苗面世,各國疫情有望受控,經濟有望復蘇。野村上周發表報告,預期申洲上季定單強勁增長,增長勢頭更會持續至今年上半年,並上調其目標價至176.2元。花旗月初亦發表報告,預期申洲可望受惠RCEP,並上調其目標價至175元。申洲周一破頂,收163.2元,升5.4%,呈頭肩底,可候160元左右收集。

-----------------------------

掌握理財智慧 感受生活品味

investMAN全新網頁 優雅登場

-----------------------------

部署退休 輕鬆達至財務自由

點擊即睇《退休理財天書》

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner