【智取大市】北水落後股做靚圓底 - 晉佳

更新時間 (HKT): 2021.01.27 02:00
■中糧家佳康連升兩日,股價舊年10月到𠵱家呈圓底,近期成交增加正等爆邊。 互聯網圖片

恒指喺超大成交之下,小時圖形成「擴張三角形」,要有心理準備迎接超大波幅,向下明顯跌穿29300點就唔使多講,確認進入單邊跌市。向上嘅話,恒指明顯突破30200點,指數以至個股都會更高速上升,以至美股都可能出現極端亢奮情況。呢一刻要確保倉位處於可承受水平。

《路透》上周五報道,話中國第四大豬肉生產商新希望六和出現超過1,000隻豬感染新型非洲豬瘟,今次新嘅豬瘟唔會令豬隻恐亡,但會令新生健康豬仔數目減少。以大陸病毒消息冚得就冚嘅慣性,睇怕已經造成一定程度影響。

回顧2018年一場非洲豬瘟,初時令到豬肉股下跌,但之後市場憧憬供應減少加快豬周期進入上升周期,令當時叫做中糧肉食嘅中糧家佳康(1610)股價爆升,半年內由1元上衝至3元樓上,及後2019年同2020年收入盈利大幅上升,反映市場憧憬最終應驗,舊年上半年生物資產公允價值調整前每股盈利35.5分,市盈率隨時只得4倍唔夠。

踏入今個星期,中糧家佳康無懼波幅市況連升兩日,股價舊年10月到𠵱家呈圓底,近期成交增加正等爆邊。同系中國食品(506)早幾日炒起,單日升兩成半,中糧家佳康喺非洲豬瘟消息之下似乎快將跟炒。中糧家佳康有中糧香港揸29.1%,北水揸20.42%,亦係等北水挾上。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner