蘋果驗樓|日出康城LP6近1200萬單位去水喉漏水如小溪 業主嚇一跳後感憂慮

更新時間 (HKT): 2021.01.29 12:00

《蘋果驗樓》邀請資深驗樓師賴達明驗收南豐及港鐵(066)合作發展的將軍澳日出康城LP6一個3房單位,入到廚房搞到一地「巾巾」,點解嘅?漏水囉,唔係滴滴吓嗰種,而是像小溪流水水長流,搞到業主方生愁更愁。方生坦言,收樓前睇街坊WhatsApp都見到好多單位瑕疵問題,到自己單位漏水漏到像小溪「嚇咗一跳!」另一個4房單位由陳智康「康仔」驗收,結果驗樓報告多達13張紙,全屋有120處瑕疵,評分53分。

明哥驗收的單位位於第5座,實用面積704方呎,業主方生於2018年以約1,169萬元買入,呎價約1.66萬元。明哥檢查廚房時發現廚櫃底有攤水,「地台濕晒,洗碗盆去水喉駁去櫃底,排水喉同煤氣喉太近,懷疑安裝時撞鬆咗。如果業主無驗樓,好難發現櫃底會積晒水。如果唔處理,日後木板會漚到發黑。」

廚櫃底空間狹窄,肥少少都未必捐得入。明哥捐入去,伸手摸入,以紙巾吸水,豈料吸極都吸唔晒,吸完水的紙巾仲會滴水。打開踢腳板,踎低一看已見水迹之多,為了查明究竟,明哥於洗碗盆儲水後一放,鏡頭清楚看見去水喉漏水漏到像小溪。去水喉漏水位置,被煤氣喉及櫃板遮住,未能即場斷定是破損還是未駁好,很大機會需要拆開部份櫃板修理喉管。站在廚房外的業主方生越聽就越擔心,一直想探頭看個究竟。事後他表示憂慮,擔心執修是否可以徹底解決問題。不過慶幸全屋沒有其他大問題,都是一些容易處理的小瑕疵,包括主人房天花收水裂紋、兩個浴室坐廁水箱未裝穩,而近年新樓常見的玻璃崩花僅客房有一塊玻璃崩花超標,需要更換。全屋最大問題就是漏水,導致排水工種零分,但其他工種沒有大問題,且單位面積大,明哥評方生單位85分。

方生表示:「當初都唔會預期單位會有100分,一定有地方要執修,但漏水真係真係超乎預期。係驗樓前,睇過街坊有啲單位洗手櫃有啲板霉咗,甚至有蟑螂,睇過自己都驚呀,最驚有漏水,驚漏落樓下造成影響。而家發現咗自己單位漏水,都憂慮,一來執修要時間,同埋執完之後係咪可以解決問題?你見條喉貼住煤氣喉,開煤氣又要延遲,成個搬入來嘅計劃就要延遲。」其後方生遞交執修後,承建商派員到單位檢查,並以膠水修補,惟方生擔心這是不是一勞永逸的處理方法,遂提出整條喉管更換的要求。

康仔驗收的單位位於第1座,實用面積906方呎,業主陳生2019年花1,521萬元買入。雖然單位沒有上述方生所面對的漏水問題,但康仔與兩位同事,三人花了超過3小時才檢驗完畢,最終驗樓報告有13張紙,有120處瑕疵,包括全屋地板多處鬆及拱起,主要在門邊及走廊位置;多處出現空心磚,分佈於客廳、露台牆、主人浴室地面、廚房窗邊、工作平台等;空心批盪亦有1處,位於主人房天花;多扇窗出現形形色色問題,包括夾口有孔、不貼框及漏風、窗刮鉸、窗框崩花有孔、外框防水膠有孔、窗框膠邊及窗鎖鬆等等。

康仔話,有兩點想講一講:「露台比較多嘢,除咗空心磚,外牆好多瀄膠冇做到,露台左邊仲有好大條隙冇瀄膠。雖然唔會滲水,但水會漏落鋁冚。其實見到係整柱都冇整瀄膠,如果上面單位入水,又機會一路滴落去。」另一點是「廁所洗手盆去水喉漏冚,而成個洗手盆櫃底冇做掃口,如果喺淋浴間就唔得,會滲水入磚底。而家呢度雖然冇咁易滲水入磚底,但水入到瓷磚背就麻煩,所以做返掃口會好啲。」單位評分56分,15項工種當中有6項工種不及格,包括瓷磚、地板、門、窗、來去水及整潔。康仔總結:「900幾呎單位可以容納瑕疵多少少,計分已經鬆手少少,咁大單位拎50幾分,係少見。」單位業主陳生回應:「如果係負責任發展商,問題係好容易可以解決。」陳太補充:「有錯唔緊要,錯咗,希望發展商幫我哋執返。」

發展商回應,方生單位廚房去水喉已完成喉管修補,亦答應業主進一步更換水喉之要求,正待業主回覆工程時間,而幕牆玻璃的刮花及污跡部分已安排吊船執修,預計短期完成。除上述兩項外,其餘項目已完成執修。另外,陳生的單位已完成執修。

-----------------------------

掌握理財智慧 感受生活品味

investMAN全新網頁 優雅登場

-----------------------------

部署退休 輕鬆達至財務自由

點擊即睇《退休理財天書》

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner