BizStarter|兩年前掃Bitcoin賺第一桶金 場外交易所老闆娘:女仔都有投資賺錢能力

更新時間 (HKT): 2021.01.31 00:00

踏入2021年,比特幣價格旋風式搶高,一舉上破3萬、4萬美元,最高見過4.2萬美元。一時間,人人話要買比特幣。加密貨幣場外交易平台Coiner創辦人Priscilla,近月見盡不少新手盲毛式入市,甚至有人對比特幣零概念下all-in,「好多人講玩比特幣身家翻倍,唔使做喇,環遊世界。如果你真係覺得放錢落去,佢就會自己生錢,咁就好易出事㗎喇。」

她又慨嘆,投資市場一般男性主導,於加入市場後不時面對男士質疑,「一個觀念植入咗落佢哋腦裏面,係一個女仔有錢去擁有一啲嘢,一定唔係靠自己能力,點解大家唔可以平等地去睇呢件事?其實好多女仔都好有投資賺錢能力。」

兩年前斥六位數買Bitcoin 賺第一桶金

Priscilla去年中創辦Coiner,主要經營美元穩定幣USDT場外兌換。場外交易所老闆娘,加上有外號「太太」之稱,記者登門訪問前,還以為她是加密幣市場老手?豈料一見真人,是一名外表標緻的80後時代女性,「我未結婚嘅,太太呢個名其實係我助手改嘅,感覺就如果未見過人嘅話,係唔會好先入為主覺得你後生,唔問你嘢或者覺得冇咁可靠。」而事實上,她參與比特幣投資亦只有2年多,但此2年,足以改變一生。

兩年多前,她不諳投資,亦不了解加密幣,結果純粹因為「朋友叫」,就投資六位數掃比特幣,「投資唔止十幾萬呀,當時比特幣係3,000尾、4,000頭美金左右,之後升到6,000幾美金,朋友就同我講可以離場呀。」身家雖然輕鬆double,今日回想起來,她坦承自己當時「未求知,先投資」膽生毛,「真係一個狗屎運囉,嗰陣時好彩冇出事,一出事嘅話就冇㗎,成世打工。」

憑運氣賺第一桶金後,她沽出部份比特幣將本金套現。同時,決定不再做盲毛,辭工兼全副心思認真由零認識加密幣市場,報讀不同課程,不停炒模擬倉了解市場運作節奏,「差唔多一年左右慢慢去學,之後覺得ok嘅時候,先再用少少資金慢慢去試。」

比特幣升浪,令其身家水漲船高,而今日的她亦不再是無知新手,並認清投資目標,將資產重新分配,分散風險,單是比特幣持倉,一半長揸,一半用作短炒,「當我賺嘅錢翻多幾倍嘅時候,其實我都會將佢拎出嚟,投資喺其他產品,例如房地產、錶。我本來投資係想搵被動收入,搵被動收入嘅方法好多,唔一定只係all-in喺一個投資產品裏面。」

買Bitcoin 未求知 勿all-in

她強調,現時投資比特幣風險高,建議新手入市前務必對市場有基本概念,同時先落細注,了解自己是否能承受如此波動的市場,「其實好多人上嚟去做找換嘅時候,連最基本其實USDT係咩都唔知,咁我問佢點解你會兌換?佢哋第一句就話朋友叫。有啲人好誇張,真係一嚟就all-in落去買。」

同時,除比特幣及以太幣此類市值較大的幣種外,新手勿接觸其他「細幣」,衍生產品、期貨亦不宜沾手,「加密貨幣本來已係風險投資產品,唔好將個風險加乘。」

投資比特幣與炒股票的心法,其實一脈相承。她就觀察所得,不少新手的常犯錯誤就是太貪心,唔肯止賺止蝕,而她自己短炒止蝕的界線,就是3%,「我自己保守啲,做短炒嘅時候我自己嘅目的就係要贏,我話我止蝕3%後再訂新策略,要贏返嗰3%好易,但假設你10%後先走,要重新贏10%係難好多。」

「女仔都可以有賺錢能力」

一如不少平台,Priscilla亦不時會開辦免費比特幣新手投資班,希望新手入市前了解市場運作。不過,她舉辦的入門班,均強調「女士優先」,此源於自己過去不時被男性質疑,「我自己喺(投資比特幣)呢邊賺到錢,都鍾意可能買錶、買車、投資房地產,佢哋會覺得你有車有錶一定唔係自己買……喺社交平台show我日常生活,啲人留言講『你係咪好鍾意錢?』、『點解你淨係分享你賺幾多?』調返轉如果係男trader做呢件事,佢哋係會覺得好佩服,好想跟佢賺錢。」因此,她希望女士亦可自強,向大家證明女性亦能有很強的賺錢能力。

對於比特幣前景,她表示由於不少基金公司、大型機構進場,因此加強市場對比特幣的信仰,「好多新聞講話會上10萬美金,我覺得有機會嘅,但係短期內我希望到咗5萬美金先,希望年中做到啦。」

Produced by: Fruity Nutty Studio

-----------------------------

掌握理財智慧 感受生活品味

investMAN全新網頁 優雅登場

-----------------------------

部署退休 輕鬆達至財務自由

點擊即睇《退休理財天書》

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner