操盤手札記|養老金南下開閘(割柑人)

更新時間 (HKT): 2021.02.01 18:00

今年首隻黑天鵝,無疑係GameStop!最令人O嘴嘅唔係散戶屠大鱷、血洗華爾街,而係後續嘅券商聯手限制散戶交易,社交媒體封殺散戶論壇。有散戶發檄文,狙擊乃因華爾街引發金融海嘯而未受罰。

回想10年前「佔領華爾街」運動,亦係反對華爾街資本家,事件背後值得深思。自由市場仲係咪自由、公平?股市從來都唔公平,由錢多貨多嘅大莊話事,美股係華爾街揸莊,《動物農莊》話齋:「有啲動物比其他動物更平等」。

今趟散戶挾爆大戶淡倉,市場擔心引發骨牌效應,大戶由其他股份、其他市場撤資救亡,引爆下一個金融危機。上周五美股喺科技巨企績優下仍跌2%,已響警號。繼對沖基金大佬Leon Cooperman同Paul Singer唱淡美股後,券商高盛同美銀亦和唱。高盛指出,美股局部出現泡沫;美銀則指出,業績好過預期嘅公司股價跑輸大市,差過預期嘅就跑贏,呢個現象係20年前科網泡沫以嚟首見,美股上半年或顯著調整。

美股回調,港股亦冇運行。周一,港股喺連跌4日後反彈2.2%,收28,892。上周內地連日顯示收水信號,人行澄清政策不急轉彎。睇經濟情況,相信未到幣策轉向,最多只係邊際收緊。正當市場擔心內地收水,北水班資回朝應付年關之際,上周五傍晚,內地首批5隻港股通股票型養老金獲批,北水再添水喉。市場預計科網龍頭係受惠股之一,因屬A股稀缺股份。科網龍頭,不離ATMXJ。當中,阿里(9988)將於周二公佈季績,市場預期按年多賺兩成,雲業務接近盈利。阿里受監管影響,股價12月尾低見207.2元,隨着消息消化,走勢已見好轉,現價251.2元,若績後靠穩,可伺機吸納。

割柑人

-----------------------------

掌握理財智慧 感受生活品味

investMAN全新網頁 優雅登場

-----------------------------

部署退休 輕鬆達至財務自由

點擊即睇《退休理財天書》

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner