【智取大市】今次跌市有乜唔同 - 晉佳

更新時間 (HKT): 2021.02.01 02:00
■喺跌市當中,北水仍單日幾十億淨買騰訊,騰訊相信係最大路伺機博反彈選擇。 資料圖片

恒指小時圖先做一個擴散三角形形態,有大成交配合,再跌穿支持線,之後日線圖更出現向下跳空並肩陰燭,接連出現強烈利淡訊號,指數情況固然差。

呢種同2018年月、2020年3月跌市嘅指數走勢相若,唔同嘅係,熱炒股跌勢冇咁大亦冇咁全面,例如港股方面,恒指周五先反彈後急回,仍有保利協鑫(3800)、移卡(9923)同康方(9926)大彈。

美股方面,WSB股繼續大上落,疫苗股Novavax股價狂升逾六成,帶動疫苗板塊。聯儲局包底唔會容許發生流動性危機,即使跌市亦能維持市場流動性過多嘅預期,於是投資者沽出大路超昂貴強勢股後,仍會樂意去買一啲新跑出嘅板塊,因此有別於過去大調整。投資者呢一刻清倉嘅風險,實在不低於滿倉。

疫苗股方面,醫療冷鏈運輸股Cryoport早前急升後回吐,但近日喺配股價66美元樓上見支持,成交喺造旗期間回復淡靜,適逢疫苗運輸問題嚴重,如果有好消息跟尾,料有下一轉升勢。

至於恒指,呢一刻唔指望即時見底,仍可以將手上弱勢股出清,騰出資金等待機會博反彈,喺跌市當中,北水仍單日幾十億淨買騰訊(700),騰訊相信係最大路伺機博反彈選擇。至於二三線股,有re-rate升勢backup康方相信都係可靠之選。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner