【笑到最後】跟新契媽炒政治市 - 高明

更新時間 (HKT): 2021.02.01 02:00
■美股新契媽Nancy Pelosi喺去年12月買入蘋果、Tesla同迪士尼期權,食正整個大浪。跟新契媽買貨,肯定冇錯! 資料圖片

今次GameStop事件,我唔會特別buy WSB提倡打大鱷嘅理念,買入嘅投資者都係為賺錢。造好造淡,大家都出於一個貪字。

成件事只有兩個重點:一,贏定輸;二,合約精神。贏定輸係自己嘅事,同我冇關係。只有合約精神,係所有投資者嘅common ground共同基礎,但券商反應,睇嚟呢個價值已有所動搖,又或者,大戶輸打贏要本質從來冇變。

至於因為挾空倉而出現沽壓,未來甚可能出現系統性風險甚至股災。2018年底嘅一次大跌,聲稱程式盤出錯,但係當年證券行並無因為程式盤導致股災,而禁絕所有程式盤。今次反而限制散戶買股,個別股份甚至諾基亞都受限,雙重標準下只容許大戶贏,唯一寄望係兩黨召開聽證會,將會有些微制衡。

至於事件對後市嘅影響,高明可以話畀大家知,格局從無變過,由去年11月起deep state浮面,擺明決定總統人選,到今次券商出賣散戶,手法一模一樣,以禁聲代替辯論,以禁買代替市場定價。Deep state依然掌握關鍵權力,即使偶然被散戶突襲,但簡單限制買賣已可消滅購買力,下次再被突襲亦可出茅招,清盤亦有聯儲局救,然後由主流傳媒洗白,社交媒體ban戶口,基本上必勝。

美股深層政治市崛起,跟舊契媽Cathie Wood炒股已經out咗,新契媽(美股)Nancy Pelosi先正確。佩洛西夫婦喺去年12月買入蘋果、Tesla同迪士尼期權,食正整個大浪。雖然不排除落決定係佢老公Paul Pelosi,但係因為眾議院議長身份要申報,所以我哋先得知天機。

所謂「若你不能打敗它,參與它」,更重要問題,我又冇選票,根本無資格打敗或參與。總之有錢齊齊搵,跟新契媽買貨,肯定冇錯!

高明

fb.com/bigricetea

關心你飯碗,貼近你生活,即Like「蘋果ATM」FB專頁!
BannerBanner