【魚樂無窮】電動車+雲概念股 - 唐牛

更新時間 (HKT): 2021.02.02 02:00
■嘉利國際由原本主打五金塑膠及內房的工業股,搖身一變成為電動車概念股,釋放價值可以好得人驚。 互聯網圖片

本欄愛股嘉利國際(1050)昨早發通告update業務,帶動股價創出歷史新高,再次進入冇蟹貨區,向上動力無極限。

去到高位仲咁睇好?因為今次份通告含金量極高︰集團首度披露,兩年前開始獲得美國一家領先電動汽車充電決解方案商的充電樁外殼定單,為充電樁業務奠下良好基礎,同時表明研發團隊將進一步深化充電椿業務板塊的研發。試想想,一隻原本主打五金塑膠及內房的工業股,搖身一變成為電動車概念股,釋放價值可以好得人驚。唔信?自己睇睇本欄去年最後一日推介的力勁(558),點樣由1蚊炒到上8蚊吧。

通告亦提到,集團完成購入泰國汽車零部件及模具製造商TKT,加強汽車零部件市場的戰略佈局外,同時又在當地增設自動化生產線,預計於今年中投產,連RCEP概念都中埋。另一方面,本業五金塑膠業務銷售首9月按年升16%,增長勢頭持續,受惠在家遠端工作新趨勢、雲端服務及線上商務等需求增加,集團作為全球領先的伺服器外殼供應商,又係食正條水。

嘉利最新市值24億元,市盈率不足10倍,股息率接近8厘,集電動車及雲概念於一身,仲有內房業務加持,橫睇掂睇都係平通街,都係呢兩句總結︰有貨繼續坐定定,冇貨自己吼位入。

唐牛

http://fb.com/tongcow88

關心你飯碗,貼近你生活,即Like「蘋果ATM」FB專頁!
BannerBanner