【智取大市】啓明心通料有得炒 - 晉佳

更新時間 (HKT): 2021.02.03 02:00
■心通醫療今日開暗盤,作為心通競爭對手嘅啓明醫療,有機會被帶動炒上。 互聯網圖片

微創醫療(853)旗下心通醫療(2160)將喺今日開暗盤,心通競爭對手啓明醫療(2500)有機會被心通帶動炒上。啓明同心通主打醫治主動脈瓣狹窄(TAVR)嘅心臟瓣膜產品,由於價錢貴、適合呢種手術嘅患者少,同埋受醫療器材集採打擊,因此現有產品並非重點。兩間公司正研發經導管二尖瓣置換術(TMVR)同埋經導管三尖瓣置換術(TTVR)嘅產品先係主菜,目前全球仍處於研發階段,適合做TMVR及TTVR手術嘅患者數目遠多過TAVR,有分析估計,大約十年後,全球收入規模係幾百億美元。

心通TAVR產品定價低過啓明,佢喺大陸嘅市佔率亦超越啓明,正因為價錢較低,受集採打擊相對細,喺TTVR同TMVR研發進度仍存在變數之下,估計投資者應該覺得心通值錢過啓明,仲未計心通有新股溢價因素。不過,心通要炒上,同時要啓明強勢先得,喺目前市況之下,雙雙炒上唔難,兩者關係似京東健康(6618)同阿里健康(241),如果心通上市初時市值冇大幅拋離啓明嘅話,上市後仍值得下注。

上周提及嘅豬肉股中糧家佳康(1610)已形成圓底破頸線、一浪高過一浪走勢,距離爆上時間不遠了,噚日回落到5天線即起動,後市有條件做多一隻大陽燭,會係落後股之中嘅強股。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner