李華華Online ︳渣打推嶄新品牌 設計師讚有誠意

更新時間 (HKT): 2021.02.03 20:21

渣打集團近日重塑品牌,集團網頁已經率先改版,渣打香港臉書專頁嘅頭像亦換上新商標。華華問過設計師Joe Kwan,佢大讚渣打新branding有誠意,例如有喺網頁其他地方應用到新商標上的特色、元素-小水滴,集團網頁上的字體似乎係特別訂製,最明顯係「i」字上面嗰點換成小水滴,呼應返成個主題,讚渣打重塑品牌做得細緻、有誠意。

至於顏色方面,渣打新撈稿的顏色較為明亮,Joe笑指「銀行梗係會話young啲」,而佢自己就有另一見解,話銀行而家傾向使用online platform,「唔需要考慮太多印刷因素,所以大趨勢傾向使用RGB顏色」,聚焦在digital display,「online睇係真係sharp啲」。佢又話而家設計都係盡量平面、簡潔的icon,較少立體、陰影設計,認同渣打改走陰影合時宜。

平面設計師出身嘅「中央聖學子」始終鍾情「元祖版」,稱當年以「繩結加SC」的設計意念相當經典,18年前換撈稿令佢感到失望,「2003年加咗立體效果,令十分簡約嘅標誌複雜咗,不過可能當時科網熱流行立體感,係trendy嘅當時」。

對於今次渣打新品牌,學子認為回歸元祖撈稿嘅簡約,無咗啲無謂嘅深淺色立體感,對流行嘅考慮如screen viewing有利,不過佢就略嫌symbol比元祖版更簡單,有兩個部份成水滴狀,可能令重疊的S、C更難辨認。

講到點先係有意思嘅撈稿設計,學子話包括滙豐等唔少銀行嘅撈稿設計都好好,但強調撈稿嘅意義和影響力會隨時間、公司形象和所作所為而改變,似乎係意有所指。

渣打發言人就解釋嶄新品牌代表住喺瞬息萬變嘅世界中,銀行帶來信任,穩定和優質表現,又話新設計大膽得嚟帶點活力,適合數碼化時代,向銀行160年的歷史致敬之餘,亦表達出與客戶及其不斷變化的需求保持聯繫。

網民睇法都幾兩極化,有人認為「顏色一樣,一眼就認得返,簡潔咗仲順眼」,亦有人讚設計「夠現代感」,話渣打近年業務走向數碼化,象徵業務新里程碑。人人審美觀都唔同,有網民始終認為舊嘅比較好,甚至有人覺得「好A貨feel」,但更多係關注渣打的網上系統係咪可以跟住upgrade,咁又係,間唔中都仲聽到渣打出現系統故障、股票交易系統死機,改完品牌,都係時候搞搞個系統啦。

李華華

-----------------------------

掌握理財智慧 感受生活品味

investMAN全新網頁 優雅登場

-----------------------------

部署退休 輕鬆達至財務自由

點擊即睇《退休理財天書》

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner