【點止冧巴咁簡單】平安好醫生穩中有升 - 古天后

更新時間 (HKT): 2021.02.04 02:00
■平安好醫生可藉平安集團優勢,為企業客戶提供醫療、保險及健康管理服務,相關因素是公司獨有資源。 資料圖片

平安好醫生(1833)剛公佈截至去年12月底止全年業績,虧損擴大至9.48億元人民幣,上年同期則蝕7.34億元,但業績公佈後,股價不跌反升,主要係集團營運表現令市場滿意,睇好公司前景。

管理層表示,集團今年今年將繼續跟平安保險產品結合,提供全面醫療健康服務,包括會加大跟平安健康險合作,共同研發產品,針對平安好醫生用戶提供獨有嘅保險產品,切合用戶日常醫療需要等。

雖然有其他互聯網龍頭亦加入線上醫療行業競爭,但好醫生有獨特優勢及戰略,除咗擁自家醫生團隊外,亦可測試不同場景,另一方面公司累積咗數據及演算法,可助醫生團隊提升效率,加上目前AI技術係「人機結合」,非短時間內可被替代。公司亦可藉平安集團優勢,為企業客戶提供醫療、保險及健康管理服務,相關因素均係公司獨有資源。

平安好醫生推行嘅戰略升級計劃,包括強化其醫生團隊;擴展集團網絡醫院;及擴闊跟加深其客戶基礎。相關升級措施需要初期投資,料會令集團嘅收支平衡時間線推延,由最快2022年延至最遲2024年,不過互聯網醫療行業進入快速增長階段,公司盈利能力良好,在保持毛利率穩中有升情況下,經營效率持續提升。

另一方面,公司喺海外發展理想,以日本為例,公司與軟銀有合營,喺當地推出問診服務後亦獲用戶好評;另外,公司在東南亞亦有合資公司,於當地拓展亦理想。平安好醫生之前股價跌至80元,已大致反映收支平衡點延後嘅負面因素,如能升至120元水平企穩,可望重返之前高位甚至再創新高。

古天后

關心你飯碗,貼近你生活,即Like「蘋果ATM」FB專頁!
BannerBanner