蘋果驗樓|新居屋東涌裕泰苑43分 牆身1米長空心批盪「中頭獎」

更新時間 (HKT): 2021.02.05 00:00

經常聽到市民說抽中居屋好像「中頭獎」,真係無講錯。80後港男David以白表單身人士資格抽中東涌新居屋裕泰苑一個283方呎單位,價錢僅142萬元,係咪一分錢一分貨?居屋距離港鐵東涌站逾15分鐘步程,遲兩個月才交樓,David好擔心,事關收樓前睇到資深驗樓師賴達明「明哥」驗收這個屋苑另一個單位僅獲33分。今次《蘋果驗樓》搵明哥出手,先睇瓷磚全屋僅4塊空心磚,數量破紀錄新低,令David初時滿希望,但當明哥檢查牆身後就感到失望。明哥敲牆,對正床位一處牆身批盪,越敲越得人驚,先現裂紋,繼而露罅,最終量度空心批盪長逾1米。如不鏟底重鋪,日後認真「中頭獎」。

David是屯門人,往英國留學後回流香港搵到份好工,月薪3萬多元,2017年裸辭後前往澳洲Working Hoilday體驗人生。身在澳洲,政府以市價52折推售新居屋,「我阿媽叫我抽嘅,冇呀,香港置業好難,同埋我哋冇父幹,惟有抽居屋,首期低,成層樓自己應付到,始終為咗將來着想……本住平常心心態,無話特別想要,中咗其實好開心,因為都係白表單人。因為未試過中六合彩,未試過中任何獎,中咗呢度係好大嘅禮物。」當期居屋有3個選址,合共4,431伙,市價52折發售,接獲27.2萬份申請,超額認購逾60倍,白表方面約106人爭1個單位。

他2019年2月回香港,雖然發生社會運動,但他媽媽跟他說:「唔好放棄,因為白表抽中係千載難逢機會,買咗好過乜都冇。」最終他以約142萬元買入裕泰苑一個中層單位,實用面積283方呎,向銀行借錢110萬元,支付兩成多首期,即約32萬元,息率2.5厘,分20年,月供5,800元。樓書列明關鍵日期是去年10月,但他等到今年1月才收到樓,看見明哥驗收屋苑一個單位僅33分,他就好擔心。

東涌裕泰苑兩座共1,226伙,實用面積278至572方呎,售價118萬至313.8萬元。由港鐵東涌站步行而至約15分鐘,鄰近北大嶼山醫院。跟新居屋交樓標準一樣,沒有間出房間,全屋不鋪設地板,沒有裝置浴櫃、廚櫃及假天花,因此這些工種都沒有納入驗收範圍及計算分數。廚房廁所都會鋪設簡單的白色瓷磚,惟過往驗收新居屋,空心磚問題嚴重,閒閒地都十塊八塊。不過今次明哥檢查這個單位的廚房及廁所分別只有2塊空心磚,全屋僅4塊空心磚,明哥感愕然,其後說:「算係破紀錄地少(空心磚)!」正想打開廁所門之際,廁所門鉸位傳出像鬼屋開門的嘰嘰嘎嘎聲,明哥指,廁所門的3個門鉸都已生鏽,「反映係劣質不鏽鋼,唔襟用,好快要換。」他補充,企缸水龍頭未扭實導致輕微滲水。

全屋牆身油漆手工差,各種油漆的缺點近乎齊全,包括不平滑、大肚、波浪、掃痕、刮花、沙眼、眼淚等等。明哥一邊貼黃色紙仔,一邊輕輕敲打牆身檢查批盪有無空心,敲到客廳近窗戶位置就出事了!牆身表面即場裂開,裂紋隨即伸延,輕輕再敲,裂開露罅,明哥直指:「凹咗落去呀!如果批盪開裂超過20厘米,基本上有機會成塊批盪跌落嚟……凹得好犀利,係成塊凹咗落去。啱啱就係床頭位。」批盪空心面積長超過1米、闊約6吋。明哥評分,單位的批盪、油漆、門等工種評為零分,總評分43分。

睇完明哥驗樓,David表示:「預咗質素係差少少。其實有個單位已經心滿意足,白表嚟講,抽到呢度都算開心。百零萬算係咁,唔會太高期望。」

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner