【智取大市】大媽冇胃口變警號 - 晉佳

更新時間 (HKT): 2021.02.05 02:00
■大市關鍵係今日會唔會低開、確認一浪低過一浪,係嘅話,後市要小心可能跌破保歷加下軸而擴大跌勢。資料圖片

上一期先話且戰且走,殊不知北水淨買入大減,就成為大市嘅警號。

上海港股通全日出現輕微淨沽出5,600萬元、深圳北水淨買入大減至39億,好就好在,下晝兩點後,北水逐漸又買返啲股,反映內地冇出現流動性問題,只係比較唔願買。大家可能歸咎於下周二起北水閂閘嘅因素,大媽僅餘呢兩日照計唔會突然興之所至又再大手掃過。

睇返恒指,上月尾大調整後,首先一口氣反彈到略高過調整浪嘅0.618倍,餘勢帶動落後股喪炒,連美圖(1357)、酷派(2369)等等龍尾股都爆上。技術上,恒指小時圖自從1月下旬開始形成擴散三角形,跌破支持線大跌兩日之後,指數又火速反彈,去到保歷加上軸遇阻,關鍵係今日會唔會低開、確認一浪低過一浪,係嘅話,後市要小心可能跌破保歷加下軸而擴大跌勢,跌速或者同上月尾嗰兩棍一樣急。

上個月恒指9日RSI曾見90樓上,已見牛市見頂嘅超買迹象,大家㷫烚烚照炒個股,但爭在幾時撳緊急掣,要有心理準備新年後流動性可能轉差。至於資金要幾時先返去低質舊經濟股走一轉,如內險、內銀股,就繼續mon實了。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner