操盤手札記|盈警股都有憧憬(割柑人)

更新時間 (HKT): 2021.02.08 18:00

散戶逆襲大戶之戰,隨着空軍投降,戰況轉靜,GameStop個game都stop。不過,市場真正最大淡倉,唔係喺股市或商品市場,而係喺滙市。近日美元投機淨倉處於歷史高位,淡倉達2個標準差,滙市規模之巨,一旦挾淡,遠比GameStop或白銀大鑊。美滙指數已現築底走勢,小心!美元作為環球資產定價基準,所有熱錢同投資資金來源,一向係市場嘅「風險之母」(Mother of risks)。

上周,美滙指數低位整固後,突破頭肩底頸線91,量度升幅目標92以上,不利新興市場。大摩亦指,不排除MSCI新興市場指數或已見頂,列舉八大原因,包括美滙指數止跌。新興股市強弱同港股關係密切,若MSCI新興市場指數走樣,港股難免變樣。

睇返港股,本周五就過年,周一,北水收水前夕(港股通周二至下周三暫停),市場亦等收爐,恒指高開低走,收29,319,升0.1%。由於北水截流,少條水喉,恒指牛年之前料牛皮,喺29,000至29,500徘徊。

講到過年,繼深圳、蘇州、成都後,北京剛於周日啟動數碼人民幣紅包活動。數碼人民幣加速,上海亦喺同仁醫院發「可視卡」予醫生作數碼人民幣錢包。可視卡如八達通,屬儲值卡,拍卡支付,毋須綁定手機同內地銀行戶口。

八達通若食到跨境數碼人民幣支付條水,錢途可期。八達通大股東港鐵(066)過去一年都幾閉翳,早前更發盈警,料去年蝕48億元。不過,喺疫情下,市場不感意外,並對其售樓業務有憧憬。美銀睇好港鐵日出康城項目「LP10」同黃竹坑項目,將帶來可觀盈利。美銀、高盛對港鐵目標價,分別睇51元、48元。該股現價44.15元,10天線升穿20天線,不妨留意。

割柑人

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner