【智取大市】長假前重估概念秤先 - 晉佳

更新時間 (HKT): 2021.02.08 02:00
■港股新年期間少咗北水固然少咗動力,但新年後2月18日復市,市場憧憬大媽遲來接貨,估計假期完結前有波幅冇大跌。 資料圖片

距離北水長假期閂閘只剩一日,滬港股通淨沽出情況冇喺周五持續,同周四情況有啲出入,所以要修正睇法。

喺新年期間大陸流動性保證充足之下,若然星期一仍保持較活躍嘅北水淨買入,反映市場冇避險意願,雖然新年期間少咗北水固然少咗動力,審慎啲當整體大市同熱門股份偏反覆,但新年後2月18日復市,市場憧憬大媽遲來接貨,估計假期完結前有波幅冇大跌,re-rate主題效應持續嘅股份有機會跑出。近期一啲市值唔高、有具意義利好消息刺激嘅股份獲得資金追捧,由起步位升一倍已經係基本盤。

綠葉製藥(2186)同諾誠健華(9969)前後腳俾金手指高瓴入股。一般獲得高瓴大手入股嘅醫藥生科股,通常喺高瓴助力之下,研發同拉攏合作方面都能夠成功提升公司價值,本來綠葉同埋諾誠都係熱炒板塊之中嘅underdog,搖身一變成為追落後勢力,要留意唔少生科股由12月至今已升1倍。而新晉高瓴股份有大成交配合升勢,證明市場對佢改觀。

綠葉製藥獲高瓴入股消息一出,頭1分鐘已搶高到7元高位,單日成交28.9億元,其後4日反覆整固,一度逼近7元再調整,5個交易日成交總共超過60億元,達到市值三成左右,相信已貨落強者,以其波幅,再起動嘅話,以升1倍基本盤計,首站就睇8元,若以復牌後波幅計,8元相信仍偏向保守。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner