【Second Life】Livi疑現低級錯誤 - 杜夫人

更新時間 (HKT): 2021.02.08 02:00
■Livi近日疑似出事,IT搞錯code,將啲客開戶個姓同名倒轉晒,導致電子月結單、綁定其他銀行eDDA全部錯哂,一個低級錯誤影響幾百個新客戶。 互聯網圖片

不時有讀者報料,講下虛擬銀行有乜新動向,又或者唔抵得虛銀出錯唔公佈,向筆者舉報揭瘡疤,今日睇吓呢單。

該行1月中系統疑似出錯,重複存入利息獎賞畀客戶入,當時話有2,000人受影響,最終銀行無扣回重複入賬的款項,事件令該行損失咗20萬元。

事隔不足一個月,中銀、怡和旗下的Livi近日疑似出事,IT搞錯code,將啲客開戶個姓同名倒轉晒,「一子錯」導致電子月結單、綁定其他銀行eDDA全部錯晒,最終要人手改正,一個低級錯誤影響幾百個新客戶。

金管局副總裁阮國恒話,虛銀去年開戶宗數有42萬,驟眼睇都算唔錯,不過筆者自己都開咗4個戶口,有朋友開足8個,真正使用的市民有幾多?個別虛銀接二連三的犯上小錯誤,隨時影響整體虛銀形象,真係要正視先得。

金管局力谷銀行搞電子利是,簡直係開正虛銀嗰瓣,眾安利是功能真心唔錯,營造到派同收利是的感覺,在數碼年代總算保留到些少儀式感,估計籌備咗唔少時間。相反,其他虛銀就未有乜聲氣,報料人就覺得Livi唔夠畀力,淨係將轉賬功能換吓顏色咁就算。咁又係、至少要跟上傳統大行步伐,搞返個抽yuu積分咁先啱數?不過,佢話Livi嚟緊推出Mastercard,總算係抓緊debit card潮流的尾巴,仲提供1%現金回贈。咦?杜夫人無記錯,去年底QR code消費仲有10%回贈,𠵱家大削至1%,交易量隨時跌半。

另外,呢度一讚,富融銀行周五在facebook宣佈進行系統升級,不論金額大小,都會為收款人進行雙重核實,包括戶口號碼及姓名先進行交易。行多步咪好囉,唔知其他銀行又係咪會跟呢?

杜夫人

fb.com/mrsmarydoo

關心你飯碗,貼近你生活,即Like「蘋果ATM」FB專頁!
BannerBanner