BrandStory|熱狗黃店逆市狂開27分店 靠5招突圍 「如果我哋做堂食,應該收咗檔」

更新時間 (HKT): 2021.02.09 00:00

武漢肺炎重創本地食肆,尤其以堂食為主的餐廳,被限聚令以及禁堂食玩殘,不過亦有本地食店突圍而出,單靠外賣取勝。首次創業的Benson及Tam,五年半前創立齊柏林熱狗店,一直以來都只做外賣生意,直到前年社運後,受惠黃色經濟圈而知名度大增,在去年肺炎疫情下,一年逆市狂開7間分店至27間,生意額增長20%,每月收入近400萬元,成為黃色經濟圈的成功指標。

過去一年多,不斷見到黃店告急,遇上疫情,更令黃店、食肆雪上加霜,不過齊柏林熱狗未曾告急,更在逆市擴充分店,今年35歲的創辦人Benson直言,主打外賣市場是店舖能在疫情生存的重要因素。透過這次訪問,本文歸納出齊柏林熱狗逆市突圍的五大原因。

第一招:專揀細舖

Benson創業前已一早心儀面積較細的店舖,「主要因為租金,唔使做堂食,面積細啲冇咁大壓力,第一間舖租金裝修按金加埋,20萬就創到業,十分之抵。」其實首間店選址只算一般,「第一間係荃灣鱟地坊條巷仔,當時數人流係多人,但開舖先發現啲人流係唔會停低嘅,路德圍嗰啲人流先會停低食嘢,嗰啲先值錢。 」開業3個月才儲到一批熟客,8個月才回本。其後分店選址在人流較多以及上班族為主的地區。除此之外,因為疫情令大批零售店結業,令他們能夠以平租擴展,「而家減租都幾誇張,有間舖由6萬傾到3萬,有啲係頂手舖,計晒所有成本,30幾40萬就開到分店。」

同時熱狗店一間店舖只需3至4名員工,薪金成本較其他餐廳更低。

第二招:主打外賣

其次他們由開業至今主打外賣市場,成功在肺炎之下避過一劫,「限聚令一開始,我哋生意額就升咗20%,加上外賣平台興起,越來越多人用App叫外賣,以往佔5至1成,而家佔咗生意額2至3成。」 試過最多一日賣出逾400隻熱狗,以最平的28元熱狗計,即一日單計熱狗收入已達1.1萬元。而現時一般店舖平均一日賣200多隻熱狗。Benson笑言:「如果我哋當初做堂食,應該就收咗檔了。」越來越多港人使用外賣平台,令到開新店時選擇更多,「而家多咗外賣車手cover,咁開新分店唔一定要大街,可以隔多個街口,租金平啲。」

記者午飯時間到九龍灣分店觀察,發現人龍高峯時達20人以上,等餐時間逾半小時。至於位於荔枝角的分店,在下午4時後,人潮則較少,半小時內大約只得數位客人。

第三招:平價加盟店

第三個關鍵,是兩人選擇以平價加盟店方式快速擴充,跟「同路人齊上齊落」,Benson笑指創立品牌時已計劃走加盟店路線,跟很多珍珠奶茶店一樣,不過他們的熱狗店的加盟費卻低得出奇,最初只收取6萬元費用,同時加盟商更可以自己跟食材供應商取貨,即是Benson沒有賺取統一供應食材的差價,只收取每月營業額的數個百分點作費用。Benson坦言:「後期嘅加盟費都只係10萬,都有人笑我地唔賺加盟商嘅錢,但我覺得自己賺少啲,分店賺多啲,生存到先至長遠。」目前旗下12間店為直營店,15間為加盟店。他指出目前要先穩固公司發展,調整中央廚房產能後,會再重啟加盟方式,繼續擴張,目標是短期內開至40間分店。

第四招:同路人支持

事實上,熱狗店開業頭一年只得數間分店,但自從19年社運後,受惠黃色經濟圈,分店數目開始爆發式增長,同路人的支持可謂功不可沒,「最爆發就係社運嗰年,黃色經濟圈令到好多人識得我哋店舖,分店真係開得快咗,就連大型商場都畀我哋入去開店。」黃店要進入大地產商的商店並不容易,不可張貼文宣,更要守好商場的規則,但他認為商場租金較以往回落不少,進駐商場開店是個切實可行的做法,「當然有部份地產商聽到我哋個名,連傾都冇得傾,但有部份都俾我哋做,只要唔好畀佢哋見到唔想見嘅嘢就得。」

第五招:薄利多銷

Benson直言,熱狗跟漢堡的食材成本相若,但後者可以賣貴20元以上,但假若加價便會流失客源,例如目前最便宜的熱狗一個只售28元,很少加價:「因為做快餐店,尤其外賣,個價格好關鍵,點解有啲舖頭會執笠,除咗佢哋出餐慢,價錢太貴都係原因。如果件產品本身40幾蚊,你賣到50就已經多咗。而家我哋一個餐加埋40幾蚊,係一個幾重要嘅心理關口。」

至於外賣店出餐速度,Benson指出,若非繁忙時間,出餐只需要5分鐘,不過記者現場所見,午飯時間加上超長人龍,出餐要大約30分鐘。

未來Benson認為要出產更多新食品,以免客人食厭熱狗:「嚟緊會出手工啤,又會出炸雞。」就連最近某快餐店因航運問題出現薯餅短缺危機,Benson都立刻加入戰團,推出8元一塊薯餅吸客。

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner