樂活道|工商廈寒冬,莫貪小便宜(藍友斑)

更新時間 (HKT): 2021.02.09 17:18
■喺股市爆炒、雞犬升天、北水大量湧入香港資本市場嘅同一時間,國際大銀行紛紛退租,實在極諷刺

最近新聞報道,好多銀行都紛紛退租甲級寫字樓,早前有法國巴黎銀行、野村同麥格里退租中環,剛剛新退租,就有渣打銀行同埋瑞銀集團。喺股市爆炒、雞犬升天、北水大量湧入香港資本市場嘅同一時間,國際大銀行紛紛退租,實在極諷刺,因為股市暢旺,大多都係金融機構擴張嘅黃金時期。

歸根究柢,都係因為肺炎疫情加快咗工作方式嘅改變。疫情下,在家工作普及,大公司都睇到遙距工作其實並非唔可能,紛紛增加軟硬件投資,更將呢種工作模式恆常化。

現時好多工作都唔需要係辨公室處理,舊時其實都有好多視像會議軟件,問題係人到底願唔願意接受。中環人一般都比較高傲,覺得可以係中環返工,係一種尊貴嘅身份象徵。因此工作上即使有好多野可改用遙距方式,但就總係想返中環辦公室內處理,一來可以講吓是非,二來可以放工去吓Happy Hour。

至於高層們,泛指係中環有大房坐嗰堆,當然唔支持遙距工作,因為高層係中環的既得利益者。所以我成日都話誠哥就最醒目,簡直係物業投資之神,當佢係2017年人人都覺得甲級商業大廈供不應求嘅時候,佢就高價出售中環中心。

高位獲利可能好多人都識,但要好似誠哥咁連Zoom都中埋,除此之外,佢仲要喺各大中環寫字樓都頭痛緊搵租客嘅時候,借機重建和記大廈。計埋呢吓,真係神級操作。

曹仁超叫人「有智慧不如趁勢」,商業地產其實一向都唔易玩,回本期長,重資產,又要用心經營,唔似賣樓咁同你鋪鋪清。表面上收入穩定,其實暗藏殺機,喺互聯網發展大勢下,辨公室同埋商場活動長遠都係會轉移到網上,睇個大勢都知未來人人在家工作同埋網上購物。但人就係咁天真,特別係既得利益者,覺得呢啲野唔會發生。但當真係發生嘅時候,就一刀斷頭,身首異處。

同一道理,有些人覺得回歸之後,中國會任由香港自我發展。但喺中國崛起嘅大勢之下,香港最終嘅命運都係要擁抱大灣區。又例如,當初作為一本定位唔清唔楚嘅BNO,如今不被中國承認作為旅行證件和身份證明,其實一啲都唔出奇。

世道反反覆覆,據我所知有唔少新落成嘅工商物業,用頭兩年極高保證租金引人投資,大家對呢啲看似超荀嘅投資機會,要特別小心謹慎,千祈唔好貪小便宜就衝入市。

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner