【智取大市】龍尾股轉型待爆上 - 晉佳

更新時間 (HKT): 2021.02.10 02:00
■中國玻璃的浮法玻璃生產線。 資料圖片

舊年年尾信義玻璃(868)希望以0.9元全購中國玻璃(3300),揸住56.65%股權嘅主要股東發埋公告講明聯合拒絕接受收購,其中包括大股東、持股23%嘅中建材集團同埋持股8.35%嘅聯想控股(3396),證明呢個價絕對打動唔到大股東賣盤。

舊年11月中,中國玻璃公告表示喺江蘇同陝西兩條生產線加入超白浮法玻璃品種。另外,上星期四公佈就收購浮法玻璃及光伏玻璃生產51%簽署諒解備忘錄,可見近期陸續加入光伏玻璃概念。

如果唔計減值虧損,舊年上半年勉強錄得經營溢利,高負債之下硬食接近1.4億人民幣嘅財政成本之下要蝕錢,但係下半年行業環境好轉,光伏玻璃行業供不應求情況難改,中國玻璃轉型可以改善嚟緊業績。

轉型反映晒喺股價未?中國玻璃18億市值,市賬率0.8倍,相對洛陽玻璃(1108)市值54.7億、市賬率3.7倍,估值固然大落後,中國玻璃舊年11月起步位至今升1.5倍,比較洛玻升2倍都係偏慢。中國玻璃噚日小時圖突破三角形阻力後,中午收市前曾發力後整固,觀乎近排細價股板塊逐個爆上,中國玻璃位處強勢板塊嘅龍尾位置,相信好快輪到佢。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner