李華華Online|新世界註冊璇宮及皇都商標 重現戲院原貌

更新時間 (HKT): 2021.02.11 17:01
新世界近日申請「皇都戲院」及「璇宮戲院」商標,方便日後重現昔日戲院的原貌及光輝。

新世界(017)早前用47億元投得北角皇都戲院業權,仲話會盡量保留戲院嘅歷史面貌,包括天台俗稱「飛拱」的桁架建築,令大家都好關注呢個一級歷史建築嘅發展。華華就聽聞,新世界近日申請咗多個商標,包括「皇都戲院」同「璇宮戲院」,方便日後重現昔日戲院嘅原貌同光輝,保育工作似乎進行得如火如荼。

璇宮戲院喺皇都戲院嘅前身,為戰後第一代戲院,1952年由俄羅斯電影大亨歐德禮(Harry Odell)斥資250萬元創立,除咗特色建築令人津津樂道,喺本地文化史上亦佔一席位。據活現香港嘅評估報告,當年璇宮戲院開幕時排場好盛大,有滙豐(005)前大班摩士爵士(Sir Arthur Morse)主持剪綵儀式,又有警察樂隊表演助慶,開幕首日上映嘅電影就係荷里活歌舞片《高歌艶舞樂璇宮》,同戲院名互相呼應。

呢個可以容許過千人嘅大戲院,喺短短經營五年間,邀請過多位國際頂級古典音樂家舉辦演奏會,又引入芭蕾舞、話劇等表演,成為當時重要嘅藝術表演舞台。不過,璇宮戲院喺1957年結業,再以150萬元易手予海陸通陳氏家族,改建成由戲院、商場同住宅嘅皇都戲院大廈,繼續作為歌舞表演同電影放映場地,連鄧麗君都曾經喺皇都登台,亦喺唔少香港人睇電影嘅集體回憶。

新世界就話,已經搜集咗幾百件同皇都戲院相關嘅歷史文物,包括戲票、戲橋、制服同舊照片等,希望保育呢幢一級歷史建築之餘,將來亦可以原汁原味地呈現皇都戲院舊貌,又收集緊有關戲院嘅口述歷史,透過硬件及軟件配合令皇都戲院「重生」。戲院停業咗咁耐,華華都好想入戲院睇戲,唔知將來有無機會去皇都睇戲呢?

李華華

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner