操盤手札記|揸穩韁繩騎牛牛(割柑人)

更新時間 (HKT): 2021.02.15 15:24

恭喜發財!牛年首個交易日係年初五,雖然唔似初四咁係開市開工吉日,但本周嘅初七(周四)、初八(周五)都係吉日,牛年開局首周值得期待!其實就算唔睇通勝,周四北水復流,加上熱爆新股諾輝健康(6606)上市,逾8,500億元資金解凍,都知嗰日大吉,水頭充足嘛!

不過,牛年係咪必定牛市?咁又未必!恒指有紀錄以嚟嘅四次牛年——1973、1985、1997、2009,分別錄得:跌58.7%、升24.8%、跌33.2%、升49.5%,兩升兩跌,五五波而已;但以升跌幅度計,則全屬大上大落。今年騎牛牛,要揸穩韁繩,必須做好風險管理同注碼管理。

上周五同本周一港股過年休市,上周五美國港股ADR比例指數同本周一新加坡港股黑期,都高水約1%。環球主要股市近期都攀上高峯,到底高處未算高定高處不勝寒?Google Trends顯示,搜索「stock market bubble」日前去到頂點100,反映投資者自知正冒着風險,但唔捨得離開。

港交所(388)終於敲定CEO人選,摩根大通高層歐冠昇(Nicolas Aguzin)將會接替李小加,係首名外籍舵手。前任同候任CEO都係嚟自摩通,即係兩人背後勢力一樣!當外界對香港金融地位存疑之際任命老外,如同舊年證監會CEO歐達禮(Ashley Alder)突獲留任,有政治味。

雖然市場出現信心問題,但睇香港資本市場,尤其新股集資,仍然暢旺。港交所舊年嘅集資額全球第二,稍次納斯達克交易所;過去12年,更有7年奪冠。中美角力,港交所可望繼續接收大批中概股;而且人民幣強勢,料將吸引更多北水南下,港交所亦會水漲船高。該股現價535元,大摩、中金都睇6字頭。

割柑人

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁