【中環在線】誠哥情人節行桃花運

更新時間 (HKT): 2021.02.15 02:00
■李嘉誠到慈山寺賞花,未見紅顏知己周凱旋陪伴。李嘉誠基金會圖片

琴日年初三適逢情人節,長和系資深顧問李嘉誠專程去佢興建嘅大埔慈山寺觀賞桃花,行返個桃花運。李嘉誠基金會昨於社交網站,公開誠哥賞花相片,見誠哥身穿便服近距離賞花,精神同盛開的桃花一樣咁飽滿,不過,相中就未見誠哥嘅紅顏知己周凱旋。唔少網民留言向誠哥拜年,祝佢身體健康,龍馬精神。

早前該寺表示,誠哥知道香港人在疫情期間「想花」,半年前已在慈山寺開展栽植桃花之計劃,借供花為廣大香港人祈福,寄望新一年港人具般若之慧,明心見性,福慧同修。現時桃花狀態理想,基金會發文指,桃花「一子三桃」是好意頭之年景象,估計桃花於正月初七可如期盛開。

慈山寺網上祈願活動四日內有逾9萬人參與,誠哥知道後亦非常高興。最近佢派咗封大利是畀細仔李澤楷,就係向佢轉讓咗Zoom總值近百億元股份。如誠哥向受疫情所苦嘅市民派發利是,相信亦係唔少人嘅新年願望!

李華華

LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
BannerBanner