點止冧巴咁簡單|耐世特估值有望獲重估(古天后)

更新時間 (HKT): 2021.02.17 18:30
互聯網圖片

自從舊年通用汽車宣佈將投資發展電動車後,耐世特(1316)股價喺舊年11月開始翻咗一番,公司嘅PE亦已升至19倍,較過去5年平均數高,但喺目前相關板塊嘅股份估值,動輒幾十倍PE嘅情況下,再加上公司盈利有望上升,美國汽車市場喺政策刺激下復蘇,以及北水資金追捧等因素下,耐世特股價仍有條件力爭上游。

根據分析港股通南向資金分析,耐世特於上月為北水十大增持股份之一,排名第六位,南向資金喺1月份淨流入達6.9億元,較上月持股量增加6.2%,反映耐世特今年成為北水新寵,按港交所(388)港股通持股紀錄資料顯示,截至2月16日止,北水持有超過1.34億股耐世特股份,佔已發行股份約5.33%。

耐世特嘅管理層早前表示,管理層對生產復蘇步伐、內地訂單及利潤改善趨勢態度積極,美國市場佔集團重大收入佔比,將受惠拜登上場後加大刺激經濟措施,而世紀疫情未有進一步影響美國嘅生產,公司摩洛哥廠房穩步向上,加上機構投資者普通對內地市場,特別係其客戶吉利(175)、長安(深:000625)及長汽(2333)抱正面睇法,不少大行已調高耐世特2020至22年嘅盈利預測。

全球汽車生產及銷售今年將迎來強勁復甦,預期全球汽車銷售增長約9%,生產增14%;估計海外生產增長會跑贏銷售增長。內地汽車消費需求轉強,預料汽車銷售增長可達10%。中美均為耐世特主要市場,公司2020年表現勝預期,預期去年下半年起復甦勢頭將持續至今年。另外,電動車將對汽車零部件供應商帶嚟銷售均價提升,而傳統零部件供應商正積極留意新能源車帶來嘅機遇,相信透過研發新部件,零部件供應商可以喺新能源車爭取市佔率。

耐世特目前正積極尋求獲得中國新興電動車品牌及Tesla嘅訂單,相信耐世特有較強嘅齒條助力式電動轉向系統(REPS)產品及價格競爭優勢,而電動車品牌亦希望令供應商組合更多元化。雖然相關層面暫時十劃未有一撇,但一旦公司獲得訂單,將為公司盈利及估值,帶嚟龐大潛在上行空間。而3月份將公佈行業數據或觸發公司進一步被重新估值。近日走勢轉強,股價周三喺成交配合下突破,配合北水回歸,股價一望升穿前高位14.7元,並向16元首目標價推進,如行業數據理想獲重估,耐世特更有望突破2018年歷史高位20元,現價買入,跌穿12元止蝕。

古天后

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner