【智取大市】升市末段抱短線心態 - 晉佳

更新時間 (HKT): 2021.02.17 02:00
■距離恒指頂部有兩個星期都已經算多,大家炒還炒,心裏要打定個底,諗定見頂徵兆出現後嘅逃生路線。 資料圖片

恒指日線RSI頂背馳嘅第二個頂理應接近完成,最終究竟係雙頂背馳、定係三頂背馳?冇人估到,如果同模式最相近嘅2007年港股直通車升勢或者2015年港股大時代比較,距離恒指頂部有兩個星期都已經算多,大家炒還炒,心底裏要打定個底,要諗定見頂徵兆出現後嘅逃生路線。切記一件事,反正即抽即獎機會多的是,目前就比較適宜以短線操作為主,長遠千祈唔好留戀手上已經賣緊天價嘅貨。

長假期前破頂嘅ATM同SaaS股,喺假期後大升市腳軟,資金流入舊經濟股起動追落後炒上,大股破頂之勢相信能延續到北水重臨嘅2月18日,到時應該要見調整甚至見頂,目前只能且戰且走。

由新經濟炒到舊經濟,強勢板塊輪動性質唔會變,尚未起動破頂嘅仲有奶股同光伏玻璃股,福萊特(6865)突破平台阻力,大成交先急升後略回,後市估計沿5天線上升。細隻啲嘅陽光能源(757)0.5元邊緣企穩兼成交減少,等候再爆邊。

奶股蒙牛(2319)以慢升走勢觸及保歷加上軸,現代牧業(1117)整固後已起動,隨時有多棍,再次線啲嘅業績翻生奶股原生態牧業(1431)同中國聖牧(1432)亦準備跟進。油股爆升,油服股當中以巨濤(3303)走勢最靚仔,買賣盤有異動,似有升勢跟尾。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner