【點止冧巴咁簡單】耐世特估值有望獲重估 - 古天后

更新時間 (HKT): 2021.02.18 02:00
■耐世特於上月為北水十大增持股份之一,排名第六位。互聯網圖片

自從舊年通用汽車宣佈將投資發展電動車後,耐世特(1316)股價喺舊年11月開始翻咗一番,PE亦已升至19倍,較過去5年平均數高,但目前相關板塊嘅估值,動輒幾十倍PE,再加上公司盈利有望上升,美國汽車市場喺政策刺激下復蘇,以及北水追捧等因素下,耐世特股價仍有條件力爭上游。

根據港股通南向資金分析,耐世特上月為北水十大增持股份之一,排名第六位,截至前天,北水持有超過1.34億股耐世特股份,佔已發行股份約5.33%。

美國市場佔集團重大收入佔比,將受惠拜登上場後加大刺激經濟措施,而世紀疫情未有進一步影響美國嘅生產,公司摩洛哥廠房穩步向上,加上機構投資者普通對內地市場,特別係其客戶吉利(175)、長安(深:000625)及長汽(2333)抱正面睇法,不少大行已調高耐世特2020至22年嘅盈利預測。

耐世特目前正積極尋求獲得中國新興電動車品牌及Tesla嘅定單,相信耐世特有較強嘅齒條助力式電動轉向系統(REPS)產品及價格競爭優勢,而電動車品牌亦希望令供應商組合更多元化。雖然相關層面暫時十劃未有一撇,但一旦公司獲得定單,將為盈利及估值帶嚟龐大潛在上行空間。3月份將公佈行業數據或觸發公司進一步被重新估值。

近日走勢轉強,周三喺成交配合下突破,配合北水回歸,股價上望升穿前高位14.7元,並向16元首目標價推進,如行業數據理想獲重估,耐世特更有望突破2018年歷史高位20元,現價買入,跌穿12元止蝕。

古天后

關心你飯碗,貼近你生活,即Like「蘋果ATM」FB專頁!
BannerBanner