【冰說聰明】萬事俱備 只待盈喜 - 青冰

更新時間 (HKT): 2021.02.18 02:00
■巨騰為全球主要的laptop外殼製造商,肯定受惠於疫情下WFH浪潮。互聯網圖片

牛年首次跟《蘋果》戰友見面,在此謹祝大家身體健康,牛年大吉。

本欄在11月時寫過栢能(1263),當時話佢係Bitcoin概念股,這些日子以來,Bitcoin已經倍升有凸,可能因掘礦潮已過,栢能未有太大受惠,股價只係由2蚊升到3蚊,未算跟得上。但正如當日本欄所講,栢能的顯示卡非常好賣,實在食正全球WFH,大量添置電腦的需求,當日指半年盈利已比去年全年更高,為全年發盈喜只係時間問題。上周佢亦不負青冰所望發盈喜,話全年賺不少於1.8億,按年激增17倍,跟住股價裂口爆上,本周高見5.98元,再創兩年半高位。

栢能的故事,令青冰聯想到同類股巨騰(3336),作為全球主要的laptop外殼製造商,這個WFH浪潮肯定受惠,本港唔少投行在去年下半年,都為員工提供添置laptop的津貼,自己採購都嫌費時失事,直頭畀錢你哋自己買啦,務求在疫情反覆時盡量WFH,繼續維持服務,做到生意,上周聯想(992)出咗個靚季績,更證明laptop好賣啦。

巨騰上半年賺2.2億元,已比上年度整年多賺7,000幾萬,換言之,下半年只要無穿無爛,為全年發盈喜只係時間問題,更何況如上文所述,laptop在下半年的生意應該更勁,全年條數更令人期待,全年賺4億半樓上,無太大難度,即係話𠵱家市盈率不足7倍,息率仲有4厘,認真抵到爛。戰友可能會問,在大牛市中,點會有一隻筍嘢係被市場忽視㗎。但只要你回看栢能,佢在發盈喜前都唔算太標青,只係掹車邊有啲Bitcoin概念,才有少許升幅,但盈喜一發,由3.5元上到差唔多6蚊,都只係幾日嘅事,巨騰經歷了幾個月的橫行整固,藥引已經準備好,只待盈喜點起火頭,大爆發將隨之而來。

青冰

fb.com/chingbing888

關心你飯碗,貼近你生活,即Like「蘋果ATM」FB專頁!
BannerBanner