【智取大市】港股見頂雙訊號? - 晉佳

更新時間 (HKT): 2021.02.19 02:00
■根據歷史走勢,恒指較大機會喺今個月尾至下月初見頂。暫時建議月底前逐步減持港股。資料圖片

恒指出現兩大牛市接近見頂訊號,歷史係咪肯定會重複?好多人會話「今次一定唔同」,不過,都係睇完再自行決定吧。

第一,恒指RSI雙頂背馳。2015年港股大時代、2018年港股牛市、2007年港股直通車等等嘅牛市,都係以RSI雙頂背馳至三頂背馳終結。2000年千禧科網股熱潮較特別,做咗兩個頂背馳先炒完,但1999年尾做完第一個三頂背馳之後都有短線大跌市夾喺中間,硬食一樣大鑊。

第二,今個月恒指已明顯突破月線圖保歷加上軸。2018年1月、2015年4月、2007年10月,恒指月線圖大幅突破上軸,都係牛市終結嘅訊號,只有2007年可以有9月突破、10月再大升先見頂。講到呢度要留意兩樣嘢,首先係,恒指突破月線保歷加上軸之後,當月往往能夠月尾以接近最高位報收;另一樣要留意係,2007年大升市,恒指9月先做第一個RSI頂,而目前恒指已經做第二個RSI頂,所以恒指要重複2007年9月破上軸、10月再急升嘅走勢機會偏低。

結論:根據歷史走勢,恒指較大機會喺今個月尾至下月初見頂。如何操作?暫時只建議月底前逐步減持港股。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner