風水輪樓睇|網紅「搣時潘」深水埗「掟屎屋」 犯了5個風水毛病

更新時間 (HKT): 2021.02.19 00:00

一宗酒店直播SM男的事件令網紅Miss Pun「結業」了!這網紅正是綽號「搣時潘」的潘書韻,她自2019年年底搬入深水埗富匯居後,是非不斷,官非纏身,屋企平台甚至被人掟屎。路不轉人轉,她退出網絡工作,開辦性商品店反而有轉機。錢,她率性地說從未擔心,反而最擔心是她老公,深水埗區議員劉家衡(Andy)會否被DQ甚或受牢獄之災。住入新居約一年,去年11月他們拉埋天窗,一間住到結婚又搵錢的屋,卻又麻煩多多。著名術數家蔣匡文由深水埗風水講到劉氏夫婦的命盤,一齊《風水輪樓睇》。

入住後被捕2次 擔心老公被DQ

2019年公民黨劉家衡獲2,193票當選成為深水埗南昌北區議員,其後和潘書韻租住富匯居一個實用234方呎一房單位。租這個單位,一來業主支持,二來位處服務選區,更吸引的是有個大平台,讓他們的愛犬和貓咪自由活動。劉太說,比起之前百幾方呎的劏房,現在生活環境大幅改善。

Andy表示,搬入來後,人生有很大轉變,可能跟整個社會環境有關,工作上麻煩多多,例如區議員辦事處遭受滋擾、擺街站被攻擊繼而鬧上法庭,更因為民政署拖數,自掏荷包倒貼辦事處開支。他妻子轉變更大,劉太表示:「搬入來後被拘捕過2次,但之後發生嘅事都滿意。因為事業唔知點行落去,反而一些轉變,令我開發新領域。財運,我不嬲都唔太擔心,咁多年來都冇乜擔心過錢嘅問題,而家係再好過以前少少。由KOL變開舖頭,成績唔錯,3個月開咗2間分店,營業額穩步上升,個人運程方面係唔錯。」她指的兩次被捕,分別是「漂白水事件」及「酒店事件」,其中酒店事件是,她被一名男子性騷擾,於是報復,網上直播SM該男子,最終她與兩名友人以涉嫌破壞公眾體統被捕。事件令她決定永久退出網絡工作,其網上字號「Miss Pun結業了!」

2019年入住後,他們受到滋擾,「我哋呢度(平台)被人掟屎,上面掟啲糞便落嚟,影響咗少少情緒,但之後克服咗,而家情緒比較穩定。嗰篤係爛屎嚟,似乎樓上嗰位人兄健康狀態應該唔係太好,我諗佢會有報應。我而家最擔心我老公,佢會唔會被人拉或者DQ。」兩人風雨同路,結成夫婦,劉生面對沉重壓力,劉太轉型搵到錢。究竟這間屋風水如何?

天花倒掛好濕滯 一招化官非

蔣匡文表示,先講返深水埗風水,這區龍脈來自筆架山,經大埔道而入,大概以高登電腦中心做分界線,高登以南和以北是兩個世界,南邊是鴨寮街,再南由荔枝角道向海全屬濕淫之地,地薄無氣,遇災難時好易頂唔住。北面食到龍氣,只不過這條龍脈基本上旺商業,住宅不太興旺。富匯居在高登以北,食到龍脈的尾,大廈整體格局不錯,龍脈從大廈西北方而來,通常由此方位而來比較旺,而且食到文昌星,所以此處利名聲。玄空飛星計,單位排一、四,所謂「一四同宮,必發科名之顯」,即是出名。但有名未必有利,需要視乎室內佈局,而他們單位犯了5個室內風水毛病,包括天花倒掛、床無明堂、鏡對床、廁所對床、財位放垃圾桶。

蔣指:「門口開正財位,廚房開正旺位,兩個位啱啱好,就應咗你哋兩個,應該好旺,但睡房擺設,自己床位塞住明堂,所以你賺10蚊,原本可以儲5蚊,而家就儲得3蚊。第二,你哋受好大壓力,呢度成日好多轉變,因為廳和房嘅天花倒掛,等於成個天花壓落你張床,經常不停有轉變。所以呢度旺就旺啦,但就有咁嘅問題。」另外,睡床被鏡照住,但室內不宜擺鏡,因為鏡會增加吉星或凶星力量,風水輪流轉,吉凶之星方位隨年轉動,人生軌道就像過山車,大起大落,絕不適宜。廁所對正睡床任何時候也不好,小毛病多,甚至影響日後懷孕。

蔣續稱:「出年旺星到門,不過騎樓望出去是太歲位,太歲位唔好咁多動作,呢間屋可以擺少少嘢,化咗啲官非。但風水唔係萬能,只係助力,要睇你條命避唔避得過,但床無明堂、天花倒掛就要處理。至於生仔女,呢度旺女喎,就唔係旺仔喎。單位大門向西,整座大廈以西南向,係山星所到之處,所以生兒育女係無問題。」所謂「擺少少嘢」,就是睡床旁邊放置一件圓滑石頭以旺丁運;客廳梳化背後放「安忍水」,即一個兜內放鹽及水,鹽上放置六個5毫子及一個5元硬幣,作為化官非之用。由於門口是財位,不應該放置垃圾桶,應該放置流動水裝置。

對於劉太最關心的丈夫前景,以至個人事業及生兒育女之事,就要睇命盤。蔣博士屈指一算後,說:「睇劉生命盤,呢兩年佢同政府之間矛盾會繼續,過咗2022年,事情先可以解決。牢獄之災呢,佢有解神,應該唔會。生兒育女方面,睇兩位命盤,2023年應該有喜,而家劉太應該先保養好身體。至於劉太事業,佢條命幾靚,叫『雄宿乾元格』,呢10年佢係幾成功,古人叫命帶桃花,如果呢啲桃花喺封建社會就好大鑊,但而家變咗商業運作,命盤見佢起碼有七、八年旺氣,同埋田宅宮都唔錯。」

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner