【智取大市】物流股添新經濟元素 - 晉佳

更新時間 (HKT): 2021.02.22 02:00
■圓通速遞國際受惠疫情亦將有香港移民潮帶動,業務範圍食應形勢,又有同阿里、菜鳥進一步合作憧憬,潛在利好因素多。 互聯網圖片

物流界除咗京東物流準備香港上市之外,亦有連環併購消息。點解物流業務變得吃香,第一,阿里(9988)、美團(3690)呢類科技公司壟斷物品買賣嘅中間人角色,當佢哋估值大升,就顯得物流資產價格低殘具吸引力;第二,疫情令人流大減,物流需求大增;第三,人工智能同無人車發展未來逐步投入應用,物流業必然係受惠行業,增添新經濟元素。

香港上市物流股仲有嘉泓物流 (2130)、圓通速遞國際(6123)同中通快遞(2057),1月下旬開始前後腳轉強。其中前兩者以剛公佈盈喜計算,舊年盈利最低增幅計算,市盈率分別只係12倍同15倍。順豐啱啱公佈1月業務量繼續錄按月增長,反映物流需求有增無減,業績有望今年續升。

圓通速遞國際係A股圓通速遞嘅海外分支,母公司有阿里持股22%,阿里其中就係睇中圓通有海外業務同自己機隊,9月增持股權消息令圓通速遞國際股價升勢遠高過母公司。圓通速遞國際舊年盈利主要來自空運,今年受惠疫情亦將有香港移民潮帶動,業務範圍食應形勢,又有同阿里、菜鳥進一步合作憧憬。潛在利好因素多,舊年9月爆升後造圓底醞釀幾個月候爆上,趁物流股當旺或喪炒一轉。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner