【操盤手札記】潛在北水新貴揀蟀 - 割柑人

更新時間 (HKT): 2021.02.23 02:00
■藥明巨諾為北水潛在新貴,上年11月上市,主要從事抗癌藥研製同商業化。 互聯網圖片

外管局資本項目管理司司長喺官方刊物放風,研究鬆綁個人境外投資,配合大灣區「理財通」。北水不斷,香江水頭更足。周一,港股整固等結算,收30319,跌1%。本周唔少政經戲碼,除咗周一嘅「愛國者治港」政改研討會,仲有周三財政預算案、周五恒指季檢,密切留意。

上年底至今年初,網上討論區同券商落盤app嘅留言板,常見股民提到「3點鐘神秘力量」,意指每到下晝3點,股市以至個股,若果跌緊,都可能被一股力量托起。以雷蛇(1337)為例,上周四、五喺3點後,分別出現跌幅收窄同轉跌為升;恒指上周五亦喺3點後倒升。係咩力量?

若歐洲係夏令時間,咁歐洲股市如英法德股,喺香港時間下晝3點開市;但歐洲現時係冬令時間,遲一個鐘開市,嗰股力量唔係歐股。說穿了,又係北水!中國股市3點收市,內地資金就喺港股繼續炒股,而沽港股換A股嘅利淡操作通常喺A股收市前完成,故3點後北水利好居多。

恒指公司季度檢討結果將於周五出爐,市場預期恒指改革諮詢結果亦會同步出爐。今趟季檢,市場除咗聚焦有咩股份納入藍籌,亦關注有咩股份可以納入港股通,供北水買賣。光大證券預測,潛在入圍名單中,生物醫藥、物業管理、休閒娛樂、家具家電等消費股比例喺80%以上。

潛在新貴包括生物醫藥股藥明巨諾(2126),該公司上年11月上市,主要從事抗癌藥研製同商業化,前周同賽默飛達成合作,推動淋巴瘤CAR-T細胞免疫療法,新藥上市申請已獲受理。

里昂證券預計,該公司2023年可實現盈利。該股昨日破頂後見獲利回吐,收45.3元,睇下入唔入圍北水買貨名單。

割柑人

關心你飯碗,貼近你生活,即Like「蘋果ATM」FB專頁!
BannerBanner