【魚樂無窮】走火警發揮作用 - 唐牛

更新時間 (HKT): 2021.02.23 02:00
■港股上星期五大市先插後倒升,昨日則先高開後倒跌,chok到阿媽都唔認得,預期大市高位波動未完。 資料圖片

走火警終於發揮作用!上星期四北水回歸,港股反高潮下跌,所以進一步沽貨鎖定利潤。上星期五大市先插後倒升,昨日則先高開後倒跌,chok到阿媽都唔認得。因為已完成執倉,縱然反彈時贏得較少,但跌市時抗跌力亦較強,所以能夠從容面對。預期大市高位波動未完,可以做嘅就係睇住大數做人,回氣再上就皆大歡喜,假若盈利底線再受衝擊,也要手起刀落再減倉。講到尾,保住盈利要緊。

舊經濟股全線起動,通脹預期升溫,資源股炒到飛起;本港疫苗殺到,磚頭股、零售股、銀行股全線起動。在不同平台經常提到嘅美容孖寶——必瘦站(1830)、醫思醫療(2138)破頂再破頂,走勢一流,有貨繼續坐定定。有留意兩間公司的通告,不難發現佢哋近期強攻內地市場,擴闊版圖之餘,也可升呢成為內需股,何樂而不為?

嫌升得太多唔想追,不妨留意去年底上市的瑞麗醫美(2135),集團主要在浙江省提供醫療美容服務,勝在細細粒(市值9.5億元)易炒,昨日一棍創出收市新高,倘能突破上市高位0.51元,隨時又會升到你唔信,止蝕放在招股價0.4元。

唐牛

http://fb.com/tongcow88

關心你飯碗,貼近你生活,即Like「蘋果ATM」FB專頁!
BannerBanner