點止冧巴咁簡單|整餅阿茂一廂情願的加印花稅(古天后)

更新時間 (HKT): 2021.02.24 19:05

財爺一聲建議增加港股交易印花稅,港股應聲而下,北水錄得近200億淨流出,而單日主板全日成交錄得破紀錄的3,530億港元,喺大成交下港股錄得近千點跌幅,甚有小型股災意味。而最傷嘅當然係港交所(388),雖然去年盈利創新高,但上調印花稅影響深遠,將嚴重打擊港股未來交投量,港交所股價曾跌12%,收市亦要跌8.8%,市值蒸發超過600億元。

其實古天后好懷疑,財爺究竟識唔識計數,話就話交易印花稅加幅達三成,大吉利是講句,港股整體市值縮水三成,即使成交量維持一樣,成交金額都會跟住縮水三成,咁加咗印花稅,呢方面嘅稅收係一樣唔會增加。而預算案預期加咗印花稅後,政府收入一年會增加120億,呢個只係佢自己預計出嚟,一旦因為加印花稅趕客,港股價量齊縮,咁呢120億嘅增加收入,只係整餅阿茂一廂情願嘅預期。

雖然港股跌到一仆一碌,都總有逆市奇葩,而康師傳(322)就係少數逆市仍錄得升幅嘅股份,值得留意。事實上近日資金輪動,由新經濟股流入傳統股,而康師傳上半年業績表現優於市場預期,有資金流入貪佢估值低亦好正常。

康師傅主要喺中國從事生產及銷售即食麵、飲品及糕餅,大部分產品均使用「康師傅」品牌銷售,旗下即食麵及即飲茶飲料於中國市場佔有領導地位。截至2020年6月底止,集團營業額上升8%至329.34億元(人民幣,下同),股東應佔溢利增長58.4%至23.8億元。期內,集團來自即食麵的營業額上升29.1%至149.05億元,佔總營業額45.3%,分部溢利增長86.5%至23.21億元;飲品收入則減少4.1%至176.04億元,佔總營業額53.5%,分部溢利增長22.6%至13.51億元。

康師傅上半年喺即食麵及飲品方面跑贏主要競爭對手,係因為公司供應鏈喺疫情下反應迅速,加上品牌強勁、於低端城市滲透率較高,估計高單位數收入增長嘅情況可延至2021年,主要受惠市場份額提升及產品組合升級,此外飲品消費復甦亦帶來幫助。

不過康師傳喺中國製造及銷售即食麵、飲品及方便食品,而隨着內地嘅人均收入提升,消費者對於消費品嘅品質需求也日益提升,現時偏向追求高端品牌價值,升級消費,康師傳過去一年一直跑輸MSCI中國消費必需品,反映市場因為康師傳不屬於高端消費類別,未能受惠升級消費,對其興趣較低。但正因為此,康師傳估值喺內需消費股中,屬較便宜之選,目前市場開始追逐估值落後股份,進行估值修復之際,康師傳自然成為資金擁戴對象。

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner