【魚樂無窮】零售股滄海遺珠 - 唐牛

更新時間 (HKT): 2021.02.25 02:00
■景福中期盈利大升5倍,復蘇勢頭良好。最新手頭淨現金2.4億,存貨4.4億,市值只得3億,含金量極高。 資料圖片

陳茂波一句要調高股票印花稅,拖累恒指單日唔見近千點,全城口誅筆伐。究竟今次升市會否被一男子KO,未到最後都唔會知。經常都講,估中乜乜乜係冇用的,最緊要用適合的方法應付當前情況,我就選擇咗繼續減磅保住利潤。逆市依然有奇葩,零售股係其中一員。一來疫苗到港,二來有消費券效應。市場炒作離不開莎莎(178)、卓悅(653)、周大福(1929),今日畀兩隻生面口大家——景福(280)及叙福樓(1978),低調卻超值。

景福受惠毛利率改善、舖租成本減少及保就業資助,中期盈利大升5倍,其中第二季收入扭跌為升,復蘇勢頭良好。最新手頭淨現金2.4億,存貨4.4億,但市值只得3億,含金量極高。1月起首次回購,近兩個月出手15次,龍頭周大福已創新高,景福仍在13年低位徘徊,大有追落後空間。

敘福樓擁有多個人氣長龍品牌,包括牛涮鍋、牛角、溫野菜等,食正消費券及恢復晚市堂食概念。最新市值4億,當中近2億為現金,豐厚程度與景福不相伯仲。大股東持貨75%,意味街貨只得1億,細細粒易炒起。當太興(6811)今年已升43%,敘福樓僅得9%進賬,又係大把水位。

唐牛

http://fb.com/tongcow88

關心你飯碗,貼近你生活,即Like「蘋果ATM」FB專頁!
BannerBanner