智取大市|北水唔buy之新趨勢(晉佳)

更新時間 (HKT): 2021.02.25 16:16
■北水由買轉沽,港股唔少升市現象亦出現改變。 資料圖片

喺陳茂波宣佈上調股票印花稅之前,北水已經開始沽港股,大跌市沽多多、反彈市買返少少,基本上維持慢慢沽,呢個係客觀地睇得到嘅轉勢。北水由買轉沽,港股唔少升市現象亦出現改變。

首先,選股口味由北水重倉變北水輕倉。「契媽」Cathie Wood喺跌市大手掃Tesla,證明佢喺波動市況對股票不離不棄,對投資者嚟講係強心針,於是之前獲「契媽」青睞嘅移卡(9923)率先大幅反彈,相反,同樣SaaS概念嘅微盟(2013)因北水重倉而暫時被冷待。當然,微盟同移卡走勢差太遠,亦形成前者短線可能追落後嘅可能,但好明顯睇到喺揀股時,投資者如何取捨。

其次,較早時港股下晝往往強勢,上午升、下午升更多,上午跌、下午有買盤撈底;而家變咗上午沽、下午沽更勁,上午升、下午就派貨,玩法改變似乎同北水由瘋狂淨買入變為淨沽有關。

除咗北水之外,農曆新年後,外管局話研究每人每年5萬美元額度投資海外,投資者就趁好消息出貨,相反上調股票印花稅消息一出就大手狂沽,港股明顯地做咗提款機。

上一期講到Bitcoin主宰資本市場形勢,亦正因為Bitcoin下試4.5萬美元關口之後回穩,暫時能為大市止血。美股納指已連續兩日低位長陽燭,道指更加已破頂,港股缺北水之下積弱但未至快速大跌。如果喺美股道指破頂下,舊經濟港股挾高多一轉,帶動恒指急升,隨時迎來下次高位散貨機會。

承接早兩期所講,目前恒指已經完成RSI雙頂背馳,喺北水轉淨沽之下,靠舊經濟股推動恒指再破頂三頂背馳嘅贏面唔係完全冇,但唔算高吧。資金追捧內房股,落後舊經濟股板塊基本上已炒起晒。碧桂園服務(6098)收購藍光嘉寶(2606),雙雙停牌,後者本身市盈率大概10倍鬆啲,可見低估值物管股短線有留意價值。濱江服務(3316)早前盈喜料全年盈利升至少七成,市盈率高極只係17.8倍,以其高增長配合低估值計,更勝藍光嘉寶,有一定吸引力。近期喺15蚊左右屢獲支持,可以一博。

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner