【冰說聰明】環球資金齊沽電動車 - 青冰

更新時間 (HKT): 2021.02.25 02:00
■環球資金近排齊沽電動車股,超級龍頭大哥Tesla,一月創出900蚊美金高位,最近幾日大大棍跌,幾日內由800蚊插到619蚊。 資料圖片

過年前本欄講過,北水在今年靜悄悄從電動車概念股流走,當時計到有131億元北水從吉利(175)、贛鋒鋰業(1772)、長城汽車(2333)、廣汽(2238)及比亞迪(1211)撤離,而更有趣的是,農曆年北水放長假,可能因主要沽家收手,這些股份少了沽壓,紛紛出現小陽春,當中贛鋒鋰業更創歷史新高。

雖然股價現小陽春,但北水放完假之後仍然堅持己見,沒有動搖過沽貨的決心,從最新的CCASS數字看到,首兩天都係繼續減持以上五股,說也奇怪,執筆之時北水已經返咗嚟五日,而這幾隻股都係連跌五天,贛鋒鋰業更從高位跌近三成,雖然最近兩個交易日未有確實數字,但咁跌法,想唔賴北水都唔得啦。

北水走資,似乎亦獲得環球資金認同,因為相關概念股,近日都被狂沽。超級龍頭大哥特斯拉(Tesla),900蚊頂位係一月創出,之後都無力再上,最近幾日仲大大棍跌,幾日內由800蚊插到619蚊;蔚來在一月中創歷史新高,但踏入2月後就無運行,連續8天收陰燭;南韓兩大電池製造商LG化學及三星SDI,又係一月見頂,最近幾天急挫;講電池當然唔好漏咗特斯拉的好拍檔,國內巨頭寧德時代,同樣係一月見頂,昨天急插8%。如果你相信環球資金流係smart money,咁今次北水都蠢唔晒呀,由一月起已經開始分段食糊。

電動車係未來的大趨勢,相信無人會反對,未來十年電動車銷售肯定係幾何級數上升,蘋果話要做Apple Car,百度亦同吉利合作出電動車,小米(1810)雖然澄清話現階段唔搞電動車,但都無將大門完全關上,未來個市場真係百花齊放,不過又是否代表每一間車廠都會大賺呢?所以炒概念時,都要時刻提醒自己,適可宜止,嚴守止蝕呀。

青冰

fb.com/chingbing888

關心你飯碗,貼近你生活,即Like「蘋果ATM」FB專頁!
BannerBanner