【智取大市】北水唔buy之新趨勢 - 晉佳

更新時間 (HKT): 2021.02.26 02:00
■較早時港股下晝往往強勢,近期則走勢相反,玩法改變似乎同北水由瘋狂淨買入變為淨沽有關。資料圖片

公佈股票印花稅上調之前,北水已經開始大跌市沽多多、反彈市買少少。

「契媽」Cathie Wood喺跌市大手掃Tesla,證明佢喺波動市況對股票不離不棄,對投資者嚟講係強心針,於是之前獲「契媽」青睞嘅移卡(9923)率先大反彈,相反,同樣SaaS概念嘅微盟(2013)因北水重倉而暫被冷待。好明顯睇到喺揀股時,投資者如何取捨。其次,較早時港股下晝往往強勢,上午升、下午升更多,上午跌、下午有買盤撈底;𠵱家變咗上午沽、下午沽更勁,上午升、下午就派貨,玩法改變似乎同北水由瘋狂淨買入變為淨沽有關。

上一期講到Bitcoin主宰資本市場形勢,Bitcoin下試4.5萬美元後回穩,暫時為大市止血。納指已連續兩日低位長陽燭,道指更加已破頂,港股缺北水下積弱但暫未至大跌。如果喺道指破頂下,舊經濟港股挾高多一轉,帶動恒指急升,隨時迎來散貨機會。

碧桂園服務(6098)收購藍光嘉寶(2606),雙雙停牌,後者市盈率10倍鬆啲,可見低估值物管股值得留意。濱江服務(3316)早前盈喜料全年多賺至少七成,以高增長配低估值計,更勝藍光嘉寶。近期喺15蚊左右屢獲支持,可一博。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner