笑到最後|畢菲特成廢老非常好(高明)

更新時間 (HKT): 2021.02.28 14:12
■股神畢菲特曾說過,他不在乎股票的短期股價走勢,只要企業盈利能於十年後大幅增長,股價就一定會跟上。 資料圖片

科技股出現調整,市場聲稱原因係:債息上升,憂慮聯儲局會利率正常化或縮減QE規模。翻看美國10年期國債息率,2厘以下已經係超低,如果稍為升到上1.6%就話股災,過去20年美股冇可能大牛市。憂慮縮減QE規模係假新聞,股市大概跟隨兩年一次股災、三個月一次調整嘅軌迹進行,高明估計已經跌完,但係要破頂似乎要比去年9月耐。

至於科技股係咪玩完,不如問吓自己,你睇緊呢篇文章係用手機睇,淨係飛鴿傳書睇?一兩次股價下跌,唔會令人類唔再追求科技,以及創新帶來嘅成本下降。多數認為科技泡沫爆破嘅人,都係拎部iPad出嚟,影張靚相,打兩句好瀟灑嘅末日言論,放上IG或臉書,然後揸架Tesla聽Clubhouse有咩新題材。

今次科技股調整,最冇影響嘅,應該係畢菲特,潮退應該着咗羽絨,但係同時畢菲特亦係本地網上最受針對嘅投資者,被稱為廢老,廢老原因係:巴郡過去一年股價上升18%,一個普通股民閒閒地升一倍,跑贏畢菲特,所以畢菲特係廢老。

喺科技股大浪之中,高明更加尊敬畢菲特,同佢買賣股票無關,而係佢人品,翻睇財富榜,自90年代開始,畢菲特長時間盤據世界十大首富頭10名,一個長期處身世界財富頂峯嘅人,正常應該好寸。

但係你睇佢訪問,一啲都唔老氣橫秋,就算係扮畀你睇都叫肯扮謙卑。反觀過去10年科技股大升,造就幾個年輕才俊成為世界富豪,當日嘅才俊,今日已經成為老氣橫秋嘅造王者,指指點點其他人,上參議院扮都慳返,直接做人肉錄音機,短短10年由破壞性創造嘅挑戰者變成老屎忽,道德判官上身,但又要匿喺Section230後面扮平台卸責。

不過,畢菲特喺股市回報成為廢老,對世界係一件好事,因為由佢37歲身家突破1,000萬後幾何級上,如果佢90歲回報仍然係倍倍聲,連登契媽Cathie Wood冇可能崛起。好彩佢終於成廢老,其他更後生一輩有空間響朵。

高明

MeWe: https://bit.ly/2Y89PjV

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner