【智取大市】科技股成救市炮灰 - 晉佳

更新時間 (HKT): 2021.03.01 02:00
■美國活躍確診宗數下跌,科技股因此受衝擊,納指由高位跌幅,要達到舊年9月調整嘅12.6%跌幅,至少要下試12400點,睇嚟科技股短線仲有得跌。 資料圖片

十年期美債息一度搶高至1.6厘,拖累科技股大跌。當risk-free rate去到1.6厘,以呢個資金成本投入幾百倍PE嘅科技股,長遠計唔掂數。

偏偏呢個時候,多個聯儲銀行總裁派定心丸,話債息升係好事,對股市嘅意義係乜?自從舊年10月,美國通過2.2萬億美元刺激經濟方案,年尾加碼到9,000億美元,嚟緊1.9萬億美元刺激方案亦勢必通過,總共佔美國M2四分之一,相當誇張。舊年8月美債息逐步上升,當中反映美國增加發債救經濟。

環球疫苗接種進度緩慢,美國1.9萬億美元救助方案確保實體經濟唔會斷水喉,但科技股股價已倍數上升兼配股、收入大增,已儲夠子彈作未來擴充所需,現階段兩者取其輕,必然揀容忍債息上升,代價係衝擊科技股,到頭來,又係量寬加碼去撐住股價,冇第二招。

另一項科技股不利因素,係美國活躍確診個案下降。疫情令QE資金單邊湧入股市,加上對科技應用需求大增,一旦疫情受控、實體經濟回復正常,對科技股相對不利。其實喺舊年美國活躍確診宗數橫行嘅9月至10月期間,納指曾出現兩次較大調整,之後活躍確診數上升再帶動科技股向上。今年2月開始,美國活躍確診宗數下跌,科技股因此受衝擊,但納指由高位跌幅,要達到舊年9月調整嘅12.6%跌幅,至少要下試12400點,當中仲未計及債息上升因素,睇嚟科技股短線仲有得跌。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner