【智取大市】向貴價裸泳股說不 - 晉佳

更新時間 (HKT): 2021.03.05 02:00
■新經濟板塊齊齊爆升嘅日子已過,但絕非盡頭,未來日子係趁跌市吼位買贏家。 資料圖片

美債息正常化嘅過程令股票估值被迫正常化,股價打個六折都仲係高,能夠每年盈利回報頂得住1.4厘資金成本嘅科技股原來都唔係好多,呢個亦形成幾近冇PE嘅美團(3690)遠遠跑輸30倍forward PE嘅騰訊(700)嘅原因。高估值股份嘅掙扎期相信會持續好一段日子,但不代表好股已見頂。

掙扎期過後,就如股神嗰句,慢慢從股價會睇到邊一隻高估值股份喺度裸泳。以電動車板塊為例,中美矛盾升級,市場驚影響到稀土、鋰電供應鏈從而打擊電動車供應量,本身係完美估值嘅Tesla股價回落好正常,蔚來、理想、小鵬亦由高位唔見一截。幾隻股裏面,Tesla規模大之餘亦掌握國際化供應鏈,有如蘋果一樣,未來受打擊程度偏小,目前只待估值回落至更合理水平。小鵬一直被指CS做得差,估計未來難有翻頭客,會相對開發能力較強嘅蔚來、同背靠美團嘅理想差啲,呢啲就係未來嘅分野。

至於光伏板塊情況原來更不妙,標準化產品面對行業供應增加,形成光伏玻璃股無差別下跌,未來走勢亦變得冇差別。

新經濟板塊齊齊爆升嘅日子已過,但絕非盡頭,未來日子係趁跌市吼位買贏家,最重要係要識分,呢一點日後詳談。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner