蘋果實測|《一個女仔租深水埗驚唔驚》 「被人問候我覺得好煩」

更新時間 (HKT): 2021.03.05 00:00

話說連登討論區有帖文《一個女仔租深水埗驚唔驚》,源於一名網民想租深水埗樓而有些憂慮,結果引來不少回應,包括有一樓一鳳、大媽髮廊、道友吸毒,穿梭南昌街與欽州街之街道,會被叔父笑淫淫咁撩,有男網友話:「一個男人行都驚,唔好話女仔。」今次《蘋果驗樓》適逢海壇街海珀入伙,就由室外驗到室內,直擊深水埗的日與夜,印證這裏是否網民形容的「慾望之城」。說時遲,那時快,直擊翌日「明哥」深水埗「愛心飯堂」就被爆竊。

記者一個女仔,下午4時,由港鐵深水埗站行去海壇街,都未起步,站在C出口地面,已看見一名略胖的南亞裔女子站立多時,並且不時向路過阿叔拋媚眼。途經街市,睇你點睇,好處是買餸方便,但人來人往,街道污糟邋遢。穿過荔枝角道,醫局街地舖立立雜雜,有廢物回收、五金舖、車房等等。附近南昌街休憩公園就是曾被傳媒拍攝到道友當眾啪針的地方,不入虎穴,焉得虎子,入去行個圈,未見道友即場除褲啪針,但有個阿伯貼住記者背脊行,令記者心跳加速。記者扮淡定行出公園,仍被園內叔父望到實一實。一路之隔是美沙酮診所,診所外是疑似交易點,看見有人數銀紙,有人睇水,更離譜是,即場拍到一名灰衫男子向一名坐於診所外的男子買入一些物品,並隨即除低口罩,將物品放於口中。

接近黃昏,基隆街至大南街一段的南昌街即現「快閃黨」,一架架貨車駛到路邊擺地攤,主要是二手貨,賣鞋、家電、手機等,奇怪是竟然賣CD。地攤延伸至大南街,小販以非本地人為主,行到中段,一名南亞裔人士指住記者心口攝影機,不停耍手,其後吹響一下哨子,記者裝作若無其事地離開。

晚上10時,街市收檔,看見有人在街邊開枱飲酒玩骰盅,日光日白叔父望都唔望吓記者,卻到月黑風高,一名中年南亞裔男子望住記者說:「Hello!how are you?」或許文化差異,但腦海閃過一些網民留言,包括「我仲係學生嗰時,日日都俾南亞佬同啲叔父撩,有啲變態仲會行過掃吓你大髀,夜少少仲會吊你尾,好恐怖!」「有晚去深水埗食嘢都好驚,啲南亞裔見到後生女就笑淫淫咁撩你。」沿途唐樓紅色光管亮着,代表一樓一鳳經營中,有幾個檔口的出入口有大漢看守。

由地鐵站行到海壇街,雖然步程僅約7分鐘,日頭人煙稠密,感覺尚算安全,但到晚上,記者認為:如果你問我自己一個行過嚟驚唔驚?我夜晚經北河街,見到有人飲酒,仲要被人撩,佢可能唔會有咩不軌意圖,但作為女仔唔會開心囉,佢同我講hello嗰下,真係好乞人憎,我只係想返屋企啫!如果日日都被人咁sweet問候,我會覺得好煩!

去年底多名深水埗區議員關注疫症下區內治安問題,當時第1次問警方,警方無交代數字,多名區議員要求下,才獲得後補資料。數字顯示,2020年上半年深水埗區有2,769宗罪案較2019年同期升28%,其中增幅最多是行劫案,錄得34宗,升1.6倍,詐騙及爆竊分別升79.8%及69.2%。值得一提,警方回覆罪案上升的理由是「在經歷一年的社會動蘯後,部分市民的守法意識減弱;而疫情亦令疲弱的經濟進一步下行,因此亦增加了社會的犯罪風險。」

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner