【智取大市】高估值股恐怖耐力賽 - 晉佳

更新時間 (HKT): 2021.03.08 02:00
■今次跌市嘅特點,唔係增長股基本因素變樣,而係估值升至超級高。Tesla近一個半月,由高位下跌超過三成。 資料圖片

先恒指由日線RSI雙頂背馳以及月線圖明顯上破保歷加上軸嘅見頂訊號出現後,觀乎過去15年,每次恒指同樣情況會先下試周線保歷加中軸,呢個星期將延伸至27900點左右,再下一步先睇到指數會好似2015年港股大時代直插冇水花,定係好似其他幾輪跌市、喺周線保歷加中軸企穩然後上落幾個月,喺美國無限量寬子彈之下,難產生流動性危機,因此中線上落市機會遠高過直插。

今次跌市嘅特點,唔係增長股基本因素變樣,而係估值升至超級高。眼下科技股似係特價時段,不過由樂觀轉為冷靜嘅過程,持有高估值股份要預咗你未必經得起嘅耐力考驗。

例如電動車股,以Tesla作為模板嘅蔚來,舊年交付量係Tesla十分之一,市值亦大約係Tesla嘅十分之一。喺中國限稀土出口(中國為加工大國)、美國加強半導體供應鏈,雙方互片幾可肯定升級,只要供應鏈一時三刻唔暢順,亦會影響到交付量,打擊增長速度。Tesla最近面對售後服務嘅批評,亦顯示交付量大增後會出現後續考驗,相信蔚來更甚。

如果手持呢類股份,未來幾個月要有心理準備聽到一連串壞消息打擊你嘅信念,悲觀時認為手持股份將變成行業輸家時,隨時會喺低位賤價沽出。辦別長線贏家,加強自己持貨信念,變得極為重要。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner