【笑到最後】慳錢黨唔啱玩拜登市 - 高明

更新時間 (HKT): 2021.03.08 02:00
■拜登風格係傾、吹水,可能瞓陣,然後再傾,股市反彈要多啲時間。 資料圖片

美國總統拜登上任未到兩個月,美股已經高位下跌,去到呢一刻有兩個問題要問:(1)換總統係咪代表美股從此玩完?(2)調整完未?

關於(1),政治上攻擊對手當然會話拜登上台美國玩完,但係今次聲稱跌市原因係美國10年期債息上升,市場恐懼聯儲局收水。債息升升跌跌成日發生,談不上美股玩完。美股要玩完,要出現更加結構性嘅轉變,例如資金管制,暫時未出現。

關於(2),係咪調整完?視乎你揸咩股,如果揸早前當炒嘅股份,其實處於股災。但係,資金唔單止轉炒石油、銀行股,一樣有科網股逆市上升,包括科技保安股,同埋旅遊網站股,更似炒完一個場,轉去炒另一個場。

今次股市下跌,只係初步確認拜登舊政,做嘢特別慢,如果今次係特朗普做總統,肯定喝住鮑威爾叫佢壓低長債息率,催谷股市反彈。拜登風格係傾、吹水,可能瞓陣,然後再傾,股市反彈要多啲時間。

科技股話事人經歷咗咁多先有今日壟斷地位,會唔會因為債息上升就「失去了一切」?唔會。反而似趁跌勢要你班散戶嘔返出嚟,一年後Big Tech股價肯定高過今日,事實上亦都搵唔到替代品。

債息上升令到資金從科技股抽走只係過渡期,1.9萬億方案通過前已放風再推3萬億方案,已經發展到冇得返轉頭嘅地步。

有拜登特色嘅股市,有一類人可能唔適合呢個周期,就係打工儲錢平日搭車帶飯慳得一蚊就一蚊嘅人,但股票就幾十萬幾百萬咁買落去。拜登舊政股價長期sleepy,股價一跌,佢哋聯想到輸咗幾多個lunch。平日知慳識儉,股價跌即刻睇到身家跌幾多,影響到心情,不如去買樓收租更加切合人物性格。

高明

fb.com/bigricetea