【操盤手札記】炒油股嚴守止蝕 - 割柑人

更新時間 (HKT): 2021.03.09 02:00
■上周四OPEC+再埋枱,傾掂維持減產規模,油價應聲再上,摩通、高盛更調高油價預測。 資料圖片

美國就業數據遠勝預期,刺激美國10年期國債孳息上周五高見1.624厘,係繼前周四(2月25日)高見1.614厘後,7個交易日內再破1.6厘,反映投資者喺經濟有迹象復蘇下,更擔心通脹升溫。

雖然聯儲局官員話債市未至無序,令債息稍回,但昨日亞洲市再觸1.6厘,未肯回至1.5厘警戒線下。

美國國債孳息上升由通脹預期同實際利率推動,實際利率通常參考美國抗通脹債券(TIPS)收益率。同年期嘅國債同TIPS嘅收益率之差,就係通脹預期。今趟通脹預期上升同商品牛市有關,商品牛熊周期則睇供求狀況同美元周期,商品多以美元計價,美元跌商品價升,反之亦然。

大宗商品中,油價舊年4月破天荒跌至負數,除咗金價,其他商品價格亦大跌,但隨着經濟重啟,加上美元開始下跌周期,商品價格回升。不過,油價回升亦關油組同盟友(OPEC+)減產事。上周四OPEC+再埋枱,傾掂維持減產規模,油價應聲再上,摩通、高盛更調高油價預測。

喺周日,全球最大石油出口國沙地,石油重鎮遇襲,影響原油供應,更令火熱油價火上加油。周一亞洲市油價飆逾2%,紐約期油高見每桶67.98美元,布蘭特期油高見每桶71.38美元。石油係通脹之母,通脹升溫不利股市。周一港股再跌1.9%,本周焦點係中美周三公佈通脹數據。

債息趨升,高估值嘅科技股捱沽,銀行、資源等周期股受捧。「三桶油」搶鏡,中海油(883)、中石油(857)、中石化(386)分別再漲2%、4.1%、1.4%。「三桶油」中,中海油係唯一每桶油成本唔超過30美元,公司今年淨產量目標為5.45億至5.55億桶油,不妨留意。

不過,油價已升唔少,炒油股宜嚴守止蝕。

割柑人

關心你飯碗,貼近你生活,即Like「蘋果ATM」FB專頁!
BannerBanner