【魚樂無窮】股海生存靠兩招 - 唐牛

更新時間 (HKT): 2021.03.09 02:00
■港股中的新經濟股近期面臨小股災,不少新手已遭今浪調整淹沒被抬離場。要在股票市場生存,最緊要學識保本及保住利潤。 資料圖片

港股昨日開市承接上周五美股升勢造好,但可惜威咗一個鐘唔夠,已跟隨美股期貨倒跌。拖冧恒指嘅主要係新經濟股如騰訊(700)、美團(3690)等,2月股價在天堂,3月已重回人間,科技指數今年升幅亦已全線蒸發,快來快去。

債息上升,令資金從新經濟股流走,熱錢同步湧入舊經濟股。有大行估計,今次美國10年期債息有機升至2厘,相信股市短線繼續小漲大回,每次反彈暫時都可視為逃生門,只能等待資金對債息變化敏感度降低,股市才能喘穩。

近日發現各個財經直播平台,觀看人數出現一定程度的的跌幅,究其原因,就係不少新手已遭今浪調整淹沒被抬離場。老老實實,我都做過新手,十幾年前也試過輸到心灰意冷,但勝敗乃兵家常事,最緊要學費唔好白交。要在股票市場生存,最緊要學識兩件事︰第一,保本。正所謂有賭未為輸,但有本才可翻身,否則嚟緊恒指10萬點都唔關你事;第二,保住利潤。炒股票為贏錢,絕對唔係談戀愛,你愛隻股票都係因為幫你賺到錢,對嗎?要實踐上述兩件事,就係要懂得止賺止蝕,知易行難,共勉之。

唐牛

http://fb.com/tongcow88

關心你飯碗,貼近你生活,即Like「蘋果ATM」FB專頁!
BannerBanner